भांगरभूंय | प्रतिनिधी
नगराध्यक्षा कडल्यान चवकशेचें आस्वासन
भांगरभूंय । प्रतिनिधी
म्हापशें: कुचेली कोयर प्रकल्पांत कांय पालिका कर्मचारी शारा भायलो कोयर घेतात. सप्तकांत तीन खेपे ट्रकभर कोयर प्रकल्पांत उडयतात. हे विशींची सीसीटीव्ही फुटेज लेगीत अधिकाऱ्यांनी मुख्याधिकाऱ्यांक सादर केल्या. ह्या कोयराचें शुल्क कोणाच्या बोल्सांत वता, हाची चवकशी करची, अशी मागणी नगरसेविका शुभांगी वायंगणकार हांणी पालिका मंडळाचे बसकेंत केली.
बिरेस्तारा 4 मेक म्हापशें पालिका मंडळाचे बसकेंत नगरसेविका केल ब्रागांझा हांणी कोयर संकलन आनी नितळसाणीचो प्रस्न उपस्थीत केलो. आपल्या प्रभागांत कोयर संकलन आनी नितळसाणीचें काम जायना. फाटले स म्हयने लोक समस्या पिडेस्त जाल्यात. लोकांक आमकां फुडो करचो पडटा. तातूंत सुसुत्रता केन्ना येतली, असो प्रस्न ब्रागांझा हांणी उपस्थीत केलो.
आमचे कडेन सध्या कामगारांचो उणाव आसा. आतां दिसवड्या वयले 17 कामगार घेतले. ते उपरांत सगळ्या प्रभागांतली ही समस्या सुटावी जातली, अशें आस्वासन नगराध्यक्ष प्रिया मिशाळ हांणी दिलें.
ह्या प्रस्नाचेर उलयतना शुभांगी वायंगणकार हांणी सांगलें, पालिकेच्या कुचेली प्रकल्पांत ट्रक भरून भायलो कोयर उडयतात. कांय कर्मचाऱ्यांच्या बऱ्यापणान हो प्रकार सुरू आसा. ह्या कोयराचें वर्गीकरण करपा खातीर थंयच्या 23 कामगारांक वापरतात. जर पालिका वाठारांतले नितळसाणी खातीर कामगार नात जाल्यार भायल्या कोयराचें वर्गीकरणा खातीर कामगार कशे वापरतात? हालींच कुचेली प्रकल्पांत ट्रकाक प्रवेश दिवंक नाशिल्लान तो आसगांव सड्या वयल्या प्रकल्पांत पाविल्लो. हे कामगार प्रभागांचे नितळसाणी खातीर वापरचे. तशेंच हो जो भायलो कोयर हाडून उडोवपाचो प्रकार आसा तो ताकतिकेन बंद करून ताची चवकशी करची.
नगरसेविका अन्वी कोरगांवकार हांणी लेगीत सांगलें, प्रकल्पांत भायलो कोयर उडोवपाचो हो प्रकार सांजेच्या 5 ते 6 वरां मजगतीं घडला. ती सीसीटीव्ही फुटेज अधिकाऱ्यांनी सादर केल्या. ताची चवकशी जावपाक जाय.
हो प्रकार गंभीर आशिल्ल्याचें मत हेर नगरसेवकांनी उक्तायलें. चर्चे उपरांत ह्या प्रकरणांतले चवकशेचें आस्वासन नगराध्यक्ष मिशाळ हांणी दिलें.
28 दुकानांचे पावणेचो थाराव मंजूर
हे बसकेंत पोरण्या आंतरराज्य बसस्टॅण्डा लागसारच्या पालिकेचे इमारतींतले पयल्या माळ्या वयल्या 28 दुकानांची पावणी करपाचो थाराव मंजूर केलो. तातूंतलें एक दुकान विधवा बायले खातीर आरक्षीत आसतले. तशेंच वर्सभराच्या काळांत 15 हजार म्हयन्याक वेतन हे पद्दतीचेर 3 कनिश्ठ कारकून घेवपाचें थारलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
