भांगरभूंय | प्रतिनिधी
म्हापशें, प्रतिनिधी ः सरकारान संपादीत केल्ले खडपावाडो-कुचेलीचे सुवातेर अतिक्रमण करून बेकायदेशीरपणान बांदिल्लीं बांदकामां उडोवपाचें काम हातांत घेतलें. ही कारवाय सुरळीत करपा खातीर संबंदीतांनी बांदकामां बेगीनूच रिकामीं करचीं, असो आदेश उपजिल्लोधिकारी कबीर शिरगांवकार हांणी संबंदितांक नोटीस धाडून दिला.
जमनींत अतिक्रमण करून सुमार १४० पक्कीं घरां बांदल्यांत. म्हापशें शार पीटी शीट नंबर १,चलन नंबर १०/३ आनी पीटी शीट नंबर २ चलन नंबर ११/१ मदले सरकारी जमनींत बेकायदेशीर बांदकामां केल्ले खातीर उपजिल्लोधिकार्यांनी गोंय बांधकाम जमीन बंदी कायदो कलम ६ खाला ही नोटीस जारी केल्या. हीं बांदकामां मोडपा खातीर अतिक्रमण हटाव पंगडाची मागणी केल्या. बांदकाम मोडपाचें काम सुरळीत जावपाक सुवातो खाली करपाचे निर्देश दितात, अशें नोटीसींत म्हणलां.
मजगतीं, सरकारान ही सुवात सर्वधर्मीय मसंडभूंये खातीर संपादीत केल्ली. वयल्या दोनूय नंबरां मदीं सुमार ३१ हजार चौरस मिटर जमनीचो आसपाव आसा. फाटल्या ७ ऑक्टोबराक सर्व्हे अधिकारी हे सुवातेचो सर्व्हे खातीर आयले. तेन्ना हांगा अतिक्रमण करून बेकायदेशीरपणान घरां बांदिल्ल्याचें उक्तें जाल्लें.
आपल्या घरांचेर कारवाय जावपाची आसा, अशें कळटक थंय रावपी लोकांक धक्को बसलो. उपरांत सगळे लोक एकठांय आयले. तांणी लाखांनी रुपया घेवन हे सरकारी जमनीत घरां बांदपाक प्रवृत्त करपी चवगां आड म्हापशें पुलिशेंत कागाळ केल्ली. म्हत्वाचें म्हळ्यार, म्हापशें नगरपालिकेन ह्या सरकारी जमनींत अतिक्रमण करून बांदिल्लीं बेकायदेशीर घरांक नळ आनी लायट जोडणी खातीर ना हरकत दाखलो दिल्लो. ते प्रमाण ह्या बांदकामाक मुळाव्यो सुविधा वीज खातें आनी उदका पुरवण विभागा कडल्यान मेळोवन दिल्ल्यो. हे दाखले तांणी कशे दिले, ताची चवकशी करपाची मागणी कांय जाणांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
