भांगरभूंय | प्रतिनिधी
भांगरभूंय । प्रतिनिधी
म्हापशें: खडपावाडो- कुचेली, म्हापश्यां सरकारान संपादीत केल्ले जमनीर अतिक्रमण करून बेकायदेशीर तरेन बांदिल्लीं घरां 6 सप्तकां भितर स्वता जावन मोडचीं. ते खातीर एका सप्तकांत हमीपत्र सादर करचें, ह्या आदेशा सयत राज्य सरकाराक कुचेली कोमुनिदादीच्या पदाधिकाऱ्यां आड फौजदारी कारवाय करपाची मेकळीक उच्च न्यायालयान दिल्या.
सरकारान संपादीत केल्ली कुचेली कोमुनिदादीचे जमनीर अतिक्रमण केल्ल्या घरांचेर उपजिल्होधिकाऱ्यान मंगळारा 12 नोव्हेंबराक कारवाय हातांत घेतिल्ली. हे कारवाये आड सिखा झा, राजेश झा, गिरीश नायक आनी तुळशीराम मुन्नीलाल हांणी मुंबय उच्च न्यायालयांत याचिका दाखल केल्ली. मात न्यायालयान मंगळारा कारवायेक स्थगिती दिवपाक न्हयकार दिल्लो. तशेंच हीं बांदकामां केन्ना मेरेन मोडटले हाची म्हायती दिवपाक सांगिल्लें.
बुधवारा 13 नोव्हेंबराक सुनावणे वेळार याचिकादारांनी आपली याचिका फाटीं घेतली. ते उपरांत न्यायालयांत याचिकादार आनी लोकांक स सप्तकां भितर सुवात रिती करची, कसलेच तरेचो विक्री वेव्हार करचे नात वा मालमत्तेचें तिसऱ्या पक्षा कडेन अधिकार निर्माण करचे नात, याचिकादारांनी स्वता जावन बांदकाम मोडचें वा अतिक्रमण काडपाचो खर्च फारीक करचो, दिल्ले मुजतींत आदेशाची कार्यवाय जावंक ना जाल्यार बांदकाम मोडपाचें काम हातांत घेतले, एका म्हयन्यांत हमीपत्र सादर करूंक ना जाल्यार फुडली कारवाय करतले, अशे निर्देश न्यायालयान दिले.
याचिकारादांचे अर्थीक स्थितीचो विचार करून ते पिडीत म्हूण गोंय बांदकामा वयलो जमीन प्रतिबंध कायद्या प्रमाण तांचे आड फौजदारी कारवाय करपाचो प्रस्ताव सरकाराचो ना, अशें न्यायालयांत अॅडव्होकेट जनरलान (एजी) स्पश्ट केलें. एजीच्या हे भुमिकेचें न्यायालयान कवतूक केलें. मात भुसंपादन कायद्याचे तजविजे प्रमाण राज्य सरकारान जमीन संपादीत केले उपरांत याचिकादारांनी ते जमनीचें वांटप करपाक जापसालदार आशिल्ल्या कुचेली कोमुनिदादीच्या पदाधिकाऱ्यां आड योग्य दिवाणी वा फौजदारी कारवाय सुरू करपाक सरकाराक मेकळीक आसा. तशेंच याचिकादार बांदकाम करप्यांक कायद्या प्रमाण कोमुनिदादी आड वसुली वा लुकसाण भरपायेची योग्य कार्यवाय करपाक लेगीत न्यायालयान मेकळीक दिल्या. न्यायमुर्ती एम. एस. कर्णीक आनी निवेदिता मेहता हांणी हो निवाडो दिलो. मजगतीं, उपजिल्होधिकाऱ्यान मंगळारा आनी बुधवारा अतिक्रमण हटाव पंगडाच्या आदारान 36 घरांतलीं 32 बांदकामां मोडलीं. जाल्यार वयल्या चार जाणांनी उच्च न्यायालयांत याचिका दाखल केल्ल्यान तांच्या बांदकामांचेर कारवाय करूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
