भांगरभूंय | प्रतिनिधी
खक महाबळेश्वर सैल हांच्या कोंकणी साहित्याक मातयेचो वास आसा. सातत्यान ते बरयत आसात. तांच्याच ‘हावठण’ हे कादंबरेच्या आदारान हांव हो लेख बरयतां. आदल्या तेंपार मातयेचीं आयदनां खूब प्रमाणांत वापरप जातालें, पूण आतां तांचो वापर कमी जायत गेला. कांय हाॅटेलांनी फॅशन म्हूण तीं वापरतात, तितलींच. मातयेच्या आयदनान जेवण रांदिल्लें जेवपाक खूब रूचीक लागता आनी आमची भलायकी इबाडना.
सकयक कांय मातयेचीं आयदनां आनी तांचो वापर खंय खंय जाता हें स्पश्ट केलां.
मडकी:- मडकेन उदक भरून दवरप, तें उदक पिवपाक फ्रिजांतलें कशें लागता. गरम उदक पिवपी मनशां लेगीत उदक मडकेंत तापोवन दवरून पिवपाक शकतात. मडक्यांचो वापर खूब कडेन जाता जशें पिवपाक उदक भरून दवरप, मरणा वळार करपी शास्त्राक आनी तशेंच बारा दिसां कडेन चोरू शिजोवंक, लग्न कार्याक, देवाची जोगवण दिवपाक, शीत वा पेज रांदपाक आदीं.
तवो:- मातये पासून तयार केल्लो तवो. जातूंत आमी चपाती, भाकरी, भाजूंक शकतात. तशेंच शिंगोळी (एक तराची तांदळा पासून केल्ली भाकरी) भाजूंक चड प्रमाणांत वापरतात.
मिलेर:- पयशे घालून दवरचे. ल्हान भुरग्यांक पयशे घालून दवरपाक मदत जाता. पयलीं गोलूच आकाराचे आसताले, पूण आतां वेगवेगळ्या प्रकारांचे येवपाक लागल्यात.
भाण:- न्हांवपाक उदक तापोवपाची व्हडली मडकी. आतां भाण मातयेचें वापरप कमी जालां, तर हीं भाणां आतां देवाक जोगवण घालपा वेळारूच वापरप जाता.
मायटीं:- व्हड आनी ल्हान अशीं दोन प्रकाराचीं आसतात. व्हड मायटेन रांदपाक जाता, नुस्तें घालून दवरपाक जाता आनी ल्हान मायटीं मडकेंचेर धांपूंक वापरतात.
कुंड:- कुंड म्हणल्यार वाज. हीं दोन प्रकारांत येतात. एक झाडां नटपाचीं आनी दूसरें शोकेसीन दवरपाचें.
कुळणें:- कुळणें म्हणल्यार नुस्त्याचीं कडी करपाचें आयदन. हातूंत नुस्त्याची कडी रांदली जाल्यार रूचीक बरी लागता.
धुपाणें (धुपा आयदन):- उज्याचे इंगळें (कोळशे) घालून तातूंत धूप घालप मागीर ताचो सुगंध सुंदर येता आनी आमचें मन प्रसन्न करता.
अशीं आनी हेर खूब आयदनां आसात, ते विशीं फुडले खेप पळोवया.
वैष्णवी शेटकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
