भांगरभूंय | प्रतिनिधी
25 मे मेरेन मुख्य रस्त्याच्या रुंदीकरणाचें काम सुरू करपाचें थळाव्यांक आस्वासन
भांगरभूंय । प्रतिनिधी
फोंडें: कुंडयच्या मानसवाड्यार बिरेस्तारा 4 मेक सकाळीं बांदकाम खात्याच्या अभियंत्यांनी थळावे लोक तशेंच पंचायत मंडळा कडेन चर्चा करून मुख्य रस्त्याचें काम 25 मे मेरेन सुरू करपाचें आस्वासन दिलें. ताका लागून थळाव्या लोकांनी बिरेस्तार सावन येरादारी सुरू करपाक हयकार दिलो. तरी लेगीत दिल्ले मुजतींत मुख्य रस्त्याचें रुंदीकरण करपाचें काम सुरू केलें ना जाल्यार सर्वीस रस्तो परतून येरादारी खातीर बंद करपाची शिटकावणी थळाव्या लोकांनी दिली. फाटल्या आयतारा राती वेळार देंवतेर कंटेनर उमथून 8 वाहनांचें लुकसाण जाल्लें. तातूंत दोन मोटारी आनी स दुचाकींचो आस्पाव आशिल्लो. ह्या अपघातांत 6 जाण जखमी जाल्ले. वाठारांत परतून परतून अपघात जायत आशिल्ल्यान थळाव्या लोकांनी सर्वीस रस्त्या वयली सगळे तरेची येरादारी बंद केल्ली. बिरेस्तारा सकाळीं बांदकाम खात्याचे सहाय्यक अभियंते संजय बखले हांणी सरपंच सर्वेश जल्मी, आदले सरपंच रामू नायक आनी हेर थळाव्या लोकां कडेन चर्चा केली. ह्या वेळार फोंडें म्हालाचे मामलेदार विमोद दलाल, पुलीस निरिक्षक विजयकुमार चोडणकार आनी हेर अधिकारी हाजीर आशिल्ले.
उतराक नेगार गेल्यार परतून रस्तो बंदः सरपंच
मुख्य रस्त्याचें रुंदीकरणाचें काम 25 मे मेरेन सुरू करपाचें आस्वासन बांदकाम खात्याच्या अभियंत्यांनी दिलां. ताका लागून सर्वीस रस्त्या वयल्यान येरादारी सुरू करतना वाठारांत पुलीस तैनात दवरतले. जर 25 मे मेरेन रस्त्याच्या रुंदीकरणाचें काम सुरू करपाक बांदकाम खात्याक अपेस आयलें जाल्यार थळावे लोक परतून सर्वीस रस्तो बंद करतले, अशी म्हायती सरपंच सर्वेश जल्मी हांणी ह्या वेळार दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
