भांगरभूंय | प्रतिनिधी
भांगरभूंय । प्रतिनिधी
फोंडेंः देव, देश आनी धर्म कामा खातीर वावुरपी कुंडयच्या श्रीदत्त पद्मनाभ पिठाची तपोभूमीची निर्मणी जावन तीस वर्सां पुराय जातात ह्या निमतान तपोभूमीचे संस्थापक ब्रह्मानंद स्वामीचे पुण्यतिथ निमतान आयज (बुधवार) 3 मेक “ब्रह्मानंदोत्सव” हे खाशेले कार्यावळीचें आयोजन केलां.
ब्रह्मेशानंद स्वामी आनी पिठाधीश्वर गोस्वामी सुशीलजी हाचें उपस्थितींत ही कार्यावळ जातली. सकाळच्या सत्रांत मुखेल सोयरे म्हणून गोंयचे राज्यपाल पी एस श्रीधऱन पिल्लय आनी सांजेच्या सत्रांत मुखेल सोयरे म्हणून मुख्यमंत्री डॉ प्रमोद सावंत हाजीर रावतले. दिगंबर जैन म्हासमितीचे राष्ट्रीय अध्यक्ष डॉ मणींद्र जैत हांचे सयत वेगवेगळ्या मळा वयले सनातन धर्म प्रतिनिधी कार्यावळीक हाजीर रावतले.
सकाळच्या सत्रांत सकाळीं 9 वरांचेर धर्मीक विधी, सद्गुरू भक्ती म्हायज्ञ आनी चतुर्वेद स्वाहाकार, ब्रह्मानंद स्वामी समाधीचेर म्हाभिशेक, म्हापूजा, म्हाआरती जातली. साजे 4 वरांचेर जावपी सत्रांत सद्गुरू पालखी उत्सव जातलो. रातयां 8 वरांचेर प्रकट कार्यावळ, संत म्हापूजा, गौरविका प्रकाशन, मानेस्तांचें मनोगत, संत प्रबोधन, आशीर्वचन, पादुका दर्शन जातलें. म्हाप्रसादान कार्यावळीचो समारोप जातलो. सनातन धर्मियांनी व्हडा संख्येन कार्यावळीक हाजीर रावचें अशें दत्त पद्मनाभ पिठान मागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
