भांगरभूंय | प्रतिनिधी
फोंडें: कुंडयचे वृंदावन पॉलिमर कंपनीच्या कच्च्या म्हालाची चोरी केल्ल्या प्रकरणांत फोंडें पुलिसांनी 7 दुबावितांक अटक केल्या. अटक केल्ल्यां मदले चार जाण सुरक्षा रक्षक जाल्यार तीग जाण कावलां अड्ड्यांतले कामगार आसात. फोंडें पुलीस ह्या प्रकरणांत अदीक तपास करतात.
फोंडें पुलिसांनी चोरी प्रकरणांत अटक केल्ल्या दुबावितां मदीं सुजीत गोयला (26), पप्पी गोयला (22), सुमतलाल गोयला (28) आनी मनोज गोयला (26, सगळे आसामचे) ह्या सुरक्षा रक्षका सयत सलमान खान (23), सबीर खान (34) आनी फैजल खान (29, भोमा वाठारांतल्या कावलां अड्ड्यांचेर काम करपी कामगार) हांचो आस्पाव आसा.
मेळिल्ले म्हायती प्रमाण कंपनीचे वेवस्थापक राकेश शर्मा हांणी फोंडें पुलीस स्टेशनाचेर कागाळ दाखल केल्ली. कागाळेंत म्हणिल्ले प्रमाण 21 जानेवारीक सांजेच्या 5.30 ते 23 जानेवारीक सकाळीं 10 वरां मजगतीं अज्ञात चोरांनी गुदांवाचें कुलूप फोडून कच्च्या म्हालाची चोरी केल्या. गुदांवांतलो सुमार 15 लाख 70 हजारांचो कच्चो म्हाल तांणी फारायला.
पुलिसांनी सुरक्षा रक्षकांची अदीक चवकशी केले उपरांत खरो प्रकार भायर सरलो. फोंडें पुलिसांनी ह्या प्रकरणांत दुबावितां कडल्यान दोन लाखांचो म्हाल ताब्यांत घेतला. फोंडें पुलीस स्टेशनाचे निरिक्षक विजयकुमार चोडणकार हांच्या मार्गदर्शना खाला उपनिरिक्षक सुरज काणकोणकार हांणी गुन्यांवाचो सोद लावपांत म्हत्वाची कामगिरी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
