भांगरभूंय | प्रतिनिधी
फोंडें: कुंडय सौदन इंजिनियरींग प्रोजेक्टा कुशीची राखणे वणत आयतारा दनपारां उटंगाराच्या पावसांत कोसळ्ळी. हातूंत राखणे वण्टी कुशीक खोंपींनी रावपी तीन कामगारांक जाग्यारूच मरण आयलें. जाल्यार अंकीत कुमार यादव (बिहार) हो कामगार जखमी जालो. मरण आयिल्ल्यां मदीं दिलीप यादव (37, बिहार) मुकेश कुमार सिंग (38, ओडिसा), त्रिमाल नायक (47) ह्या कामगारांचो आस्पाव आसा.
आयतारा सकाळ सावन सुरू आशिल्ल्या उटंगाराच्या पावसांत दनपारां 3.30 वरांच्या सुमाराक राखणे वणत कोसळ्ळी. उद्देगीक वसणुकेंत आशिल्ल्या कारखान्या कुशीक खोंपींनी रावपी तीन कामगारांक जाग्यारूच मरण आयलें. जाल्यार एक कामगार जखमी जालो. जखमी कामगाराक उपचारा खातीर गोमॅकाँत दाखल केला.
प्रकल्पांत काम करपी खूबशे कामगार ल्हानश्या खोंपींनी रावत आशिल्ल्याचें दिसून येता. आयतारा सुटयेचो दीस आशिल्ल्यान सगले कामगार दनपारां जेवन जाले उपरांत खोंपींत विसव घेताले.
घडणुकेची म्हायती मेळटकूच कुंडय आनी फोंडें उजो पालोवपी दळाचे कर्मचारी घडणूक थळार दाखल जाले. तशेंच म्हाड्डोळ पुलीस स्टेशनाचे निरिक्षक योगेश सावंत आनी हेर पुलिसांनी घडणूक थळार धांव घेतली. राखणे वण्टी पोंदा चिड्डल्ल्या कामगारांक जेसीबीच्या आदारान भायर काडले उपरांत फोंडेंच्या उपजिल्हो हॉस्पिटलांत दाखल केले. पूण हॉस्पिटलांत दाखल जावचे पयलींच तिगांकूय मरण आयिल्ल्याचें दोतोरांनी जाहीर केलें. म्हाड्डोळ पुलिसांनी घडणुकेचो पंचनामो केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
