भांगरभूंय | प्रतिनिधी
पणजी : प्रदूशणाक लागून फीश मील प्रकल्पांक विरोध जातनाय कुंकळ्ळ्यां उद्देगीक वसणुकेंत आनीक एक नुस्तें प्रक्रीया प्रकल्प (फिश मील प्लांट) सुरू करपाक प्रदूशण नियंत्रण मंडळान परवानो दिला. विरोधी पक्ष फुडारी युरी आलेमाव हांणी फीश मील प्रकल्पा पसून जावपी प्रदूशणाचो मुद्दो जायते फावटीं सभाघरांत हाजीर केल्लो.
नुस्त्याची येरादारी इंसुलेटेड वाहनांतल्यान करपा वांगडा दुशीत उदकाचेर स्वतंत्र ईटीपींत प्रक्रीया करप, प्रदूशणाच्या ऑनलायन यंत्रणेच्या आदारार मोजमाप करप अशे तरेच्या अटींचेर हो परवानो दिला.
मेसर्स गोवा मरीन इपेंक्स प्रायवेट लिमिटेडान फाटल्या वर्सा मंडळाकडेन कंसेंट टू ऑपरेट खातीर अर्ज केल्लो. कुंकळ्ळी पालिकेनूय फीश मिलाक विरोध केल्लो. उपरांत मंडळान अर्जाचो विचार करूंक नाशिल्ल्यान कंपनीन उच्च न्यायालयांत याचिका दाखल केल्ली. अर्ज विचारांत घेवपाचो आदेश उच्च न्यायालयान दिले उपरांत प्रदुशण नियंत्रण मंडळान तज्ज्ञ समिती स्थापन केल्ली. तज्ज्ञ समितीन कागदपत्रां तशेंच उपायांची पळोवणी करून अहवाल सादर केले उपरांत कंसेंट टू ऑपरेट परवानो दिवपाक मंडळान मान्यताय दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
