भांगरभूंय | प्रतिनिधी
बजरंग दलान विचारलो मुख्याध्यापकाक जाब
भांगरभूंय । प्रतिनिधी
मडगांव : कुंकळ्ळीचे एके शाळेंतल्या विद्यार्थ्यांक राखी काडपाची सक्ती केली. ह्या विशयाचेर बजरंग दलान आक्रमक भुमिका घेतली. मुख्याध्यापका कडेन चवकशी केली, तेन्ना भुरग्यांक आतां राखी काडपाक सात दिसांचो वेळ दिल्ल्याचें सांगलें. हाचेरूय बजरंग दलान नाराजी उक्तावन शिक्षण खात्यान हाचेर स्पश्टीकरण दिवपाची मागणी केल्या.
कुंकळ्ळीच्या अवर लेडी ऑफ हेल्थ हायस्कुलांतले कांय विद्यार्थी रक्षाबंधन आशिल्ल्यान राखी बांदून शाळेंत गेल्ले. मात, शाळेंतल्या शिक्षकांनी तांकां बांदिल्ली राखी काडपाक सांगली. ह्या प्रकाराची म्हायती बजरंग दलाक मेळ्ळी तेन्ना ताचे कार्यकर्ते शाळेंत गेले आनी मुख्याध्यापका कडेन चवकशी केली. त्या वेळार तांणी भुरग्यांक राखी बांदपा खातीर सप्तकभराची मुजत दिल्या, अशें स्पश्ट केलें. मात बजरंग दलाच्या कार्यकर्त्यांनी हाचेर लेगीत नाराजी उक्तायली.
विराज देसाय हांणी सांगलें, अवर लेडी ऑफ हेल्थ हायस्कुलाच्या मुख्याध्यापकाची भेट घेतली. तांणी म्हणलां, भुरग्यांनी राखी बांदली जाल्यार तांचें अभ्यासांत लक्ष लागना, ते विचलीत जातात. ते खातीर भुरग्यांक राखी बांदपा खातीर सप्तकभराचो वेळ दिला. आपूण लेगीत हे शाळेंत शिकलां. त्या वेळार केन्नाच अशे निर्बंध घालूंक नाशिल्ले. तशेंच हेच शाळेचे कुशीक कुंकळ्ळी एज्युकेशनाच्यो शाळा आसात, तातूंत अशे कसलेच निर्बंध ना. थंय सगल्या धर्मांची भुरगीं शिकतात. पोरूं हेच शाळेंत पुजा केले उपरांत तकलेक लावपी टिळो पुसपाक लायिल्लो. शिक्षण खात्या कडल्यान ह्या प्रकाराची दखल घेवन राखी बांदपा खातीर एका सप्तकाची मुजक दिल्या काय कितें ताचेर स्पश्टीकरण दिवचें, अशी तांणी मागणी केली. मजगतीं, बजरंग दलाच्या विराज देसाय हांणी कुंकळ्ळी पुलीस स्टेशनार कागाळ केल्या अशें सांगलें. नायक नांवाच्या हेर भुरग्यांक आपोवन मुख्याध्यापक शर्मिला मास्कारेन्हस हांणी राखी काडपाक सांगलें. राखी हें फक्त सूत नासून हिंदू धर्मांतल्या लोकांच्यो भावनां ताचे कडेन जुडल्यात. ताका लागून अशे प्रकार जावचे न्हय, हे खातीर शाळा वेवस्थापनाक धर्मीक भावना दुखावतल्यो, अश्यो गजाली करच्यो न्हय, अश्यो सुचोवण्यो दिवच्यो. तशेंच ह्या प्रकाराची म्हायती शिक्षण संचालनालयाक लेगीत दिवची, अशी मागणी कागाळेंत केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
