भांगरभूंय | प्रतिनिधी
मडगांव: कुंकळ्ळेंच्या पांझरखणी भागांत बुधवारा सकाळीं सुमार सात वरांचेर गाडी आनी दुचाकी हांचे मदीं भिरांकूळ अपघात जालो. हातूंत उल्हास कुष्ठा गांवकार (५५, रा. गावकरवाडो, पांझरखणी) हांकां मरण आयलें.
हे विशीं मेळिल्ले म्हायती प्रमाण, उल्हास हे ऍक्टिवा स्कुटरीवेल्यान कुकळ्ळे वटेन वताले. त्याच वेळार मुखारच्यान येवपी एर्टिगा गाडयेन दुसरे एके गाडयेक ओव्हरटेक करपाच्या यत्नांत तांचे दुचाकीक नेटान धपको दिलो. ह्या धपक्या उपरांत गांवकार हांकां बेगोबेग हॉस्पिटलांत व्हेले. मात थंय तांकां वैजकी अधिकार्यान मरण आयिल्ल्याचें सांगलें.
हे घडणुकेची म्हायती मेळटाच, कुंकळ्ळी पुलिसांनी घडणुके सुवातेर धांव घेवन पंचनामो केलो. पुलिसांनी संबंदीत गाडी चालकाक ताब्यांत घेतलो, तांचेर गुन्यांव दाखल केला. पुलीस उपनिरीक्षक किशोर वेळीप ह्या प्रकरणाचो अदीक तपास करतात.
ह्या अपघाता उपरांत थळाव्या नागरिकांनी रस्तो सुरक्षितताये वेल्यान पुलिसांक जाब विचारलो. हॉट मिक्सिंगाच्या कामा वेळार हांगचे रम्बलर (स्पीडब्रेकर) काडिल्ले, हाका लागून वाहनांचो वेग वाडिल्ल्याचो आरोप नागरिकांनी केलो. ह्या वाठारांत बेगोबेग बायपास रस्तो तयार करचो आनी वाडपी अपघातांचेर आळ घालपा खातीर खर उपाय घेवचे, अशी मागणी ग्रामस्थांनी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
