भांगरभूंय | प्रतिनिधी
मडगांव : कुंकळ्ळी आयडीसींतल्या मे. परशुराम मेटॉक्स प्रा. लि. कंपनींत सकाळीं चार वरांचेर उजो लागलो. ह्या उज्यांत कंपनींतले पेपर आनी रॉकवुलाचो व्हड सांठो लासून गोबोर जालो. तशेंच कांय यंत्रणांय लासलीं. हे विशीं रोखडेंच कुंकळ्ळी आनी मडगांव उजो पालोवपी दळाक कळयलें.
उजो पालोवपी जवानांनी रोखडेंच येवन ह्या उज्याचेर नियंत्रण हाडलें. उज्याचेर नियंत्रण मेळयले उपरांत मडगांव उजो पालोवपी दळाची गाडी फाटीं सरली आनी कुंकळ्ळी उजो पालोवपी दळाची गाडी घडणुके सुवातेर रावली.
सध्या कंपनीचे कामगार लाशिल्ले पेपर आनी हेर सामान भायर काडपाचें काम करतात. हो उजो शॉर्ट सर्किटाक लागून लागिल्ल्याचो अदमास उजो पालोवपी दळान उक्तायला. कंपनींतले मालमत्तेचें लाखांचें लुकसाण जालां. सध्या ताची म्हायती घेवप चालू आसा
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
