भांगरभूंय | प्रतिनिधी
मडगांव : कुंकळ्ळेच्या २७ वर्सां पिरायेचे तरणाटे कडेन समाजमाध्यमां वरवीं इश्टागत करून तिचे कडल्यान पयशे घेतले. उपरांत लग्नाचें हांयस दाखोवन तिचेर लैंगीक अत्त्याचारूय केले. सध्या दुबाविताची भलायकी बरी नाशिल्ल्यान तो ऍडमीट आसा अशें सांगता. ह्या प्रकरणांत दुबाविताक अटक करुन पिडेस्ताक न्याय मेळपाची गरज आसा, अशी मागणी बायलांचो एकवोटच्या आवडा व्हिएगस हांणी केली.
मडगांवां पत्रकार परिशद घेवन बायलांचो एकवोटची अध्यक्ष आवढा व्हिएगस हांणी सांगलें, मेल्सन कुतिन्हो ह्या ४५ वर्सां पिरायेच्या दुबावितान कुंकळ्ळी वाठारांतले एके २७ वर्सां पिरायेचे तरणाटे कडेन स्नॅपचॅटा वरवीं संपर्क करून तिचे कडेन इश्टागत केली. उपरांत आपल्या कुटुंबांत आडखळ आशिल्ल्याचें सांगत पयलीं २० हजार, उपरांत तिचे कडल्यान ३० हजार रक्कम घेतली. उपरांत तांणी तिचे कडेन आनीक पयशे मागले तेन्ना, तरणाटेन आपले कडलें सुमार ९० लाखांचें भांगर ताका दिलें. उपरांत तिचे कडेन बरे भशेन उलोवन, तिचे कडेन लग्न जातलों अशें सांगत तिचेर लैंगीक अत्याचार केले. आपल्याक फटयिल्ल्याचें समजतांच पिडेस्त तरणाटेन कुंकळ्ळी पुलिशेंत वचून कागाळ केली. पुलिसांनी दुबाविताक धरून वैजकी तपासणे खातीर धाडले तेन्ना तांणी भलायकी इबाडिल्ल्याचें सांगलें आनी सध्या ताका जिल्लो हॉस्पिटलांत दाखल केला. हीं फकत ताचीं नाटकां. वैजकी अधिकार्यांनी ताचेर योग्य उपचार करीत ताका पुलिसांनी परत ताब्यांत घेवचो. हे पिडेस्त तरणाटेक न्याय मेळपाची गरज आसा, अशी मागणी बायलांचो एकवोटच्या व्हिएगस हांणी केली.
पुलिसांवेल्या हल्ल्याचो निशेध
कुंकळ्ळेच्या पुलिसांचेर कामगारांनी हल्लो करीत तांकां जखमी केल. उपरांत फातोर्डा अटक करपी दुबाविताच्या कुटुंबीयांनी बायल पुलीस उपनिरीक्षकाक धुकल्ली, मुठी घातल्यो. उपरांत वास्को पुलिसांक मारपेट करपाची घडणूक घडली. ह्या घडणुकांचो निशेध करीत व्हिएगस हांणी आढावो घेतलो, अशी प्रकरणां जावचीं न्हय म्हणून समाजांतल्या अशा घटकांचेर खर कारवाय करपाची मागणी केली. बिराडाक रावपी सगल्यांची पुलीस पडताळणीचीय मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
