भांगरभूंय | प्रतिनिधी
मडगांवः पावसाळ्याचे फाटभुंयेर प्रवाशांचे सुरक्षेची खात्री करचे खातीर कुंकळ्ळी कदंबा बस स्टॅण्डाच्या पाख्याची ताकतिकेन दुरुस्ती करची, ह खातीर कुंकळ्ळी सिव्हीक आनी कंझ्युमर फोरमान (सीसीसीएफ) जिल्होधिकाऱ्यांक पत्र बरयलां.
कुंकळ्ळीच्या कदंबा बस स्टॅण्डाच्या पेड्डेर जाल्ल्या पाख्याची दुरुस्ती करूंक ना, असो हुस्को निवेदनांत उक्तायलां. सीसीसीएफान दक्षीण गोंयचे जिल्होधिकारी आनी जिल्हो दंडाधिकारी अश्वीन चंद्रू ए. हांकां बरयिल्ल्या पत्रांतल्यान कुंकळ्ळी कदंबा बस स्टॅण्डाच्या पाख्याची स्थिती तांचे नदरेक हाडून दिल्या. जिल्हो रस्तो सुरक्षा समितीच्या बसकांनी खूब खेपे ही स्थिती येरादारी संचालनलय आनी कदंबा येरादारी म्हामंडळ लिमिटेडाच्या अधिकाऱ्यांचे नदरेक हाडून दिल्ली, मात ताचेर तांणी कसलीच कार्यवाही करूंक ना, अशें पत्रांत म्हणलां.
पावसाळ्याचे फाटभुंयेर बस स्टॅण्डाची तपासणी करची, पेड्डेर जाल्लें पाखें, तकट्यांचो उणाव, बशी येवपा- वचपाचो वेळ दाखोवप ना, ह्या समस्यांचेरूय लक्ष दिवपाक जाय. ह्या प्रकरणांत ताकतिकेन हस्तक्षेप करचो, हे खातीर हें पत्र बरयलां, अशें सीसीसीएफान म्हणलां. बस स्टॅण्डाच्या पाख्याची दुरुस्ती केली ना जाल्यार भितर एकसारकें पोवत रावतलें, पाख्याचे पत्रे हुबून वतले आनी बस स्टॅण्डाचे भितरले वटेन पावसाचें उदक सांचून लोकांक त्रास जातलो, अशेंय सीसीसीएफान पत्रांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
