भांगरभूंय | प्रतिनिधी
मडगांव : कुंकळ्ळी नगरपालिकेच्या प्रभाग क्रमांक धा खातीर जाल्ले पोट वेंचणुकेंत क्रिसोस्टोमो सोराईस हे नगरसेवक म्हणून जैतिवंत जाले. जाल्यार सां जुझे दी अरीयाल पंचायतीच्या प्रभाग दोनांतल्यान पंच म्हणून संदीप नायक हांकां जैत मेळ्ळें.
कुंकळ्ळी नगरपालिका प्रभाग धा आनी सां जुझे दी अरीयाल पंचायत प्रभाग दोन खातीर आयतारा वेंचणुको जाल्यो. सोमारा सकाळीं दक्षीण गोंय जिल्लोधिकारी कार्यालयांत मतमेजणी जाली. कुंकळ्ळी नगरपालिकेच्या प्रभाग क्रमांक १० खातीर आयतारा जाल्ले पोटवेंचणुकेंत ७६० मतदारांनी मतदान केलें आनी ७२.४५ टक्के मतदान जाल्लें. प्रभाग धा खातीर प्रेमदीप देसाय आनी क्रिसोस्टोमो मारिआनो सोराईस हे वेंचणुकेक बशिल्ले. मतमेजणीवेळार क्रिसोस्टोमो सोराईस हांकां ४५३ मतां मेळ्ळीं आनी प्रेमदीप देसाय हांकां २८५ मतां मेळ्ळीं. तशेंच २२ मतां अवैध थारलीं. १६८ मतां चड घेवन सोराईस हाका जैत मेळ्ळें.
सोराईस हांणी जैता उपरांत सांगलें, ह्यान पयलींचे वेंचणुकेंत कांय मतांक लागून अपेस आयिल्लें. हे वेंचणुकेंत ज्योकीम आलेमाव आनी युरी आलेमाव हांचें फाटबळ आशिल्लें. आतां उदकाचे टाकयेचें बांदकाम, वोल्तांचेर स्पिड ब्रेकर आनी कांय रस्त्यांच्या डांबरीकरणांचें काम करतले अशें तांणी सांगलें.
सां जुझे दी अरीयाल पंचायतीच्या प्रभाग नंबर दोन खातीर ५३० मतदारांनी मतदान केलें. ७४.३३ टक्के मतदान जाल्लें. हे वेंचणुके खातीर बेर्ता दा कॉस्टा, कार्मिना कार्व्हालो, मारिओ कामोती, संदीप नायक, यशवंत रायकार हें वेंचणुकेक बशिल्ले. मत मेजणी वेळार बेर्ता दा कॉस्टा हांकां ४८, कार्मिना कार्व्हालो हांकां १०७, मारिओ कामोती हांकां ३५, संदीप नायक हांकां १९७, यशवंत रायकार हांकां १४२ मतां मेळ्ळीं. जाल्यार एक मत अवैध थारलें. हे वेंचणुकेंत संदीप नायक हे ५५ मतां चड पडिल्ल्यान जैतिवंत थारले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
