भांगरभूंय | प्रतिनिधी
मडगांवः कुंकळ्ळी उद्देगीक वसणुकेंतल्या चार युनिटांक प्रदुशणाक लागून काम बंद करपाचो आदेश दिल्लो. आतां तांकां अटींचेर काम सुरू करपाक परवानगी दिल्या. अत्याधुनीक यंत्रणा वापरून प्रदुशण जावचें न्हय म्हूण तीन ते चार म्हयन्यांचो काळ आसता. अटींक पाळो दिवंक ना, जाल्यार प्रदुशण नियंत्रण मंडळ ते युनीट कायमचे बंद करतले अशें मंत्री अालेक्स सिक्वेरा हांणी सांगलें.
मंत्री आलेक्स सिक्वेरा हांणी शुक्रारा नागरिकांच्या समस्यां विशीं म्हायती घेतली. कुटबण जेटीचेर केल्ल्या कामांचो आपूण नियाळ घेतलो. दक्षीण गोंय जिल्हाेधिकारी कार्यालयांतल्या शौचालयां सयत हेर दुरुस्ती कामां विशीं भासाभास जाली. भौशीक बांदकाम खात्यान काम करपाक जाय म्हणून आमी मुख्यमंत्र्या कडेन चर्चा करतले. एसजीपीडीए नुस्त्याच्या बाजारांत घाणयाऱ्या उदकाचो रस्न सोडोवपा खातीर चर्चा जाली.
गोंय प्रदुशण नियंत्रण मंडळान कुंकळ्ळी उद्देगीक वसणुकेंत बंद आशिल्ले चार प्रकल्प परतून सुरू करपाची परवानगी दिल्या. घाणयाऱ्या उदकाचे समस्ये विशीं आधुनीक तंत्रगिन्यानाचीं उपकरणां लावपा खातीर कांय युनिटांनी तीन ते चार म्हयन्यांचो काळ मागला. गोंय प्रदुशण नियंत्रण मंडळान तांकां अटीं प्रमाण काम करपाची परवानगी दिल्या. तशें करूंक ना जाल्यार ते युनिट कायमचे बंद करपाचो निर्णय घेतले अशें स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
