भांगरभूंय | प्रतिनिधी
हिंदी सिने मळा वेले अवलिया व्यक्तीमत्व आशिल्ले किशोर कुमार हांचो काल (4 ऑगस्ट) जल्मदीस. किशोर कुमार हे हिंदी
सिने मळाक लाभिल्लें अनमोल रत्न आसा. सिने निर्मितींतले अशें खंयचेंच मळ ना की तातूंत तांणी वांटो घेतलो ना. पार्श्वगायक, संगितकार, गीतकार, निर्मातो, दिग्दर्शक, अभिनेतो, पटकथा लेखक अशे सिने निर्मितींतल्या सगल्या मळांनी तांणी काम केलां.
किशोर कुमार हांचें मूळ नांव आभास कुमार गांगुली अशें आशिल्लें. 4 ऑगस्ट 1929 दिसा मध्य प्रदेशांतल्या खांडवा ह्या गांवांत किशोर कुमार हांचो जल्म जालो. तांचे बापूय कुंजलाल गांगुली हे वकील आशिल्ले जाल्यार आवय गौरादेवी ह्यो गृहिणी आशिल्ल्यो. तांचे व्हडले भाव अशोक कुमार आनी अनुप कुमार हे दोगूय हिंदी सिने मळार नायक म्हूण कार्यरत आशिल्ले. किशोर कुमार हे लेगीत आपल्या भावां प्रमाण सिने मळार नशीब आजमावपा खातीर धडपडत आशिल्ले.
1950 वर्सा कुंजलाल गांगुली हांणी किशोर कुमार हांकां ‘मुक्कदर’ ह्या सिनेमांत काम दिलें. 1952 ते 1960 ह्या काळांत किशोर कुमार हांणी खूबशा सिनेमांनी काम केलें. नोकरी, अधिकार, धोबी डॉक्टर, ईलजाम, मिस माला, झलक हे सिनेमा तांणी 1954 ह्या एकाच वर्सा पुराय केले. 1956 वर्सा जाल्यार तांणी 9 सिनेमांनी भुमिका केल्यो. हो त्या वेळा वेलो एक विक्रम आशिल्लो.
उपरांत ते अभिनया खातीर गायनूय करूंक लागले. अभिनय आनी गायन असो तांचो समांतर प्रवास सुरू जालो. किशोर कुमार हांणी आपल्या मिश्कील सभावान चित्रपट सृश्टींत विनोदी भुमिकांचो नवो ट्रेंड हाडलो. अभिनय करतना गायन आनी संगिताच्या तालार ‘थिरकने’ असो नवो ट्रेंड तांणी सुरू केलो. किशोर कुमार हांच्या नव्या स्टायलीन तरणाट्यांक भुरळ घाली. त्या काळांतले सगल्या दिग्गज नायिकां बराबर तांणी भुमिका केल्यो. मधुबाला बरोबर तांची विशेश जोडी जमली.
अभिनया बरोबर गायनांतूय ते येसस्वी जावंक लागले. तांची पदां लोकप्रीय जावंक लागलीं. किशोर कुमार हांकां संगीतकार सचीन देव बर्मन हांणी खूबशो संदी दिल्यो. सचीन देव बर्मन हांच्या संगीत दिग्दर्शना खाला तांणी गायिल्लीं सगलीं पदां लोकप्रीय जालीं. मुखार सचीन देव बर्मन हांचे पूत राहूल देव बर्मन उर्फ पंचमदा हांचे बरोबर तांची जोडी जमली. हे जोडयेन खूबशीं लोकप्रीय पदां चित्रपट सृश्टीक दिलीं. लता मंगेशकार आनी आशा भोसले हांचे बरोबर तांणी शेंकड्यांनी पदां गायल्यांत आनी तीं सगलीं लोकप्रीय जाल्यांत.
किशोर कुमार हांणी तीन दसकां परस चड काळ गायन केलां. देव आनंद हांचे पसून अनील कपूर हांचे मेरेन सगल्या नायकांक तांणी आवाज दिला. किशोर कुमार हांचो आवाज ज्या नायका खातीर वापरला तो नायक स्टार जालो. राजेश खन्ना बॉलिवुडाचो सुपरस्टार जावपा फाटल्यान किशोर कुमार हांचोय मोटो हात आसा. राजेश खन्ना हांच्या सगल्या चित्रपटांनी किशोर कुमार हांचोच आवाज वापरला. आराधना पसून जमिल्ले हे जोडयेन मुखार इतिहास घडयलो. हे जोडयेची सगलीं पदां हीट जालीं. ज्या ज्या वेळार राजेश खन्ना हांचे नांव येता त्या त्या वेळार किशोर कुमार हांचेंय नांव घेतात. किशोर कुमार हांणी 400 परस चड सिनेमांनी शेंकड्यांनी पदां गायलीं आनी तीं सगलीं लोकप्रीय थारलीं.
नायक, गायक ह्याच बरोबर ते दिग्दर्शकूय आशिल्ले. चलती का नाम गाडी ह्या सारक्या विनोदी सिनेमा बरोबरूच दूर गगन की छाव मे हे सारके गंभीर सिनेमाय तांणी काडले. तांणी कांय सिनेमांक संगितूय दिलां जाल्यार कांय सिनेमां खातीर पदांय बरयल्यांत. किशोर कुमार हांणी सिनेमाच्यो पटकथाय बरयल्यात. असो हो हिंदी चित्रपट सृश्टींतलो अवलिया अश्टताशी कलाकार 13 ऑक्टोबर 1987 दिसा संवसार सोडून कायमचो गेलो.
किशोर कुमार हांची जादवाच्या आवाजाची मोहिनी आयजूय कायम आसा. आयजूय तांची पदां पयलीं इतलींच लोकप्रीय आसात. किशोर कुमार हांणी सिने मळार अशी म्होर उमठायली की तांच्या नांवा बगर हिंदी सिने सृश्टीचो इतिहास पुराय जावंक शकना. किशोर कुमार हांचे जयंती दिसा तांकां नमळायेचीं आर्गां.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
