भांगरभूंय | प्रतिनिधी
किर्तनांतल्यान करियर करपाक जाता? हो प्रस्न म्हज्या मनांत खूब दीस आशिल्लो. आमच्या कोलवाळ गांवांत श्रीरामाचें नामनेचे देवूळ आसा. रामलल्लाचें दर्शन घेवपाक मुख्यमंत्री, मंत्री, थळावे आमदार, सरपंच येतात हातूंत अजाप तें कसलें? पूण एक फावट केंद्रीय गृहमंत्री लालकृष्ण आडवाणी लेगीत पाविल्ले. हांगाची रामनम पुराय गोंयांत लोकप्रीय. हांगा व्हड- व्हड किर्तनकारांनी किर्तनां केल्यांत. चडशे महाराष्ट्रांतले किर्तनकार येताले. हातूंत राष्ट्रीय पांवड्या वयले किर्तनकार लेगीत आसताले. चडशे नारदीय पंथाचे बुवा, थळावे यजमान आपयताले. नरसोबा वाडीचे किर्तनसूर्य दत्तदास घागबुवा ह्या देवळांत चड लोकप्रीय. ते खूब फावटी येताले. तांची उठबस रामभक्त दत्ता भाऊ चोडणकार हांच्या घरांत जाताली. आतां ती सेवा रामभक्त च्यारी हांगेर जाता. हे खेपे हर्षदबुवा जोगळेकार आयिल्ले. तांचो फोन म्हाका रामभक्त सुभाष शाणू नायक हांणी दिलो. हांवें वेळ करीनासतना बुवांक पयलोच प्रस्न केलो. किर्तनात करियर करपाक मेळटा?
जोगळेकार बुवा त्या प्रस्नाचेर हांसलो, म्हणपाक लागलो हय आनी ना, अशें म्हणू येता. नोकरी मेळना म्हूण उपाय नाशिल्ल्यान तुमी ह्या फांट्यांत येवं नाकात. खरें तर हें मळ करियर म्हूण पळोवं नाकात. कित्याक तर आयकुप्यांक आमी देवाचें म्हत्व सांगीत आसतात. खंयचेंय किर्तन घेतलें जाल्यार पूर्वरंग आनी उत्तररंग. पयल्या भागांत तत्वज्ञान आनी दुसऱ्या भागांत एखाद्याची गजाल जी देवा मेरेन सोडटा. तुमची स्मरणशक्त बरी आसा, संगीताचें ज्ञान आसा, बरो आवाज, इल्लो अभिनय, विनोद, संयम, सात्विक वृत्ती, वाचनाची आवड, देवा-धर्माची आवड आसा जाल्यार किर्तनाच्या मळार देंवपाचें. तुमी विज्ञान, कंपनी, वेवसाय. असो विशय घेतलो तरी शेवटाक मात देवाचें म्हत्व सांगूंक जाय, अशें जोगळेकर बुवान सांगलें.
तुमकां मुजतर जोगळेकर बुवां विशीं सांगपाक जाय. ते बीकाॅम पदवीधर. तांणी तबलें आनी पेटयेचें शास्त्रीय प्रशिक्षण घेतलां. परिक्षाय दिल्या. एकदां ते डोंगरेर किर्तनाचो दौरो करताले. तेन्ना जो बुवा आशिल्लो ताका अडचण आयली. मागीर साथ करपाक आयिल्ल्या जोगळेकरबुवाक किर्तन करचें पडलें. मागीर तांणी किर्तन करपाक सुरवात केली. आतां मेरेन तांणी तीन हजारां वयर किर्तनां केल्यांत. औरंगाबादकर बुवा लागीं तें अजून शिकतात. ते किर्तन विश्व ह्या युट्यूब चॅनलाचे किर्तनकार आसात. रोखडेच तांचें अॅप येवपाचें आसा. ताचेर बरीं- बरीं किर्तनां आयकूंक, पळोंवक मेळटलीं.
ते सांगतात, आमी देवाचो प्रसार करपाक हें परंपरीक दायज फुडें व्हरतात. नवे पिळगेंतल्या कांय जाणांक फक्त पयशेच लागतात. पयश्या फाटल्यान धांवत जाल्यार देव मेळचो ना, हें हांकां कोण सांगतलो? अणभव कसो आनी केन्ना येत तें तांकां सांगपाक जायना. सध्या नोकरी मेळप कठीण जालां. तातूंत कृत्रिम बुद्धीमत्ता आयल्या. ती कितें करीत ताचो नेम ना. आसा त्योय नोकऱ्यो वचपाची भिरांत निर्माण जाल्या. तेन्ना कोण किर्तन करपाक मुखार येता जाल्यार ती गजाल बरी. पूण ताका ताचे भितर आवड आसत जाल्यार चड बरें. किर्तनांतल्यान फक्त देवाचेंच सांगपाक जाय अशें ना. थळावे विशयूय घेवं येतात. पूण हें काम खूब नाजूक. तुमच्या गोंयांत कितलेशेच प्रस्न आसात. पर्यावरणीय म्हणात, समाजीक म्हणात. एक ना धा. ताचेर आमी कशें भाश्य करतले? ताका स्थानिकूच जाय. भायल्यान केल्यार, ताणें सुपारी घेतल्या असो आरोप जावं येता. आमी वाद करपाक येवंक नात, तर संवाद करपाक आयल्यात, अशें बुवान सांगलें. जर तुमकां किर्तनाच्या मळार करियर करपाक जाय जाल्यार तुमी हाचेरुच अवलंबून रावपाक जायना. तर अर्ध वेळ हें करियर करूं शकतात. सुरवात म्हूण तुमची भाशा तुमी वेवस्थीत करूं शकतात. आतां तर आॅनलायन शिकपाक मेळटा. आतां तर खूब उंचेलें शिक्षण घेतिल्ल्यो बायलो पसून किर्तन मळाचेर येवपाक लागल्यात, अशें बुवा सांगलें.
डाॅ. रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
