भांगरभूंय | प्रतिनिधी
राजेश मांद्रेंकार : मांद्र्यां चक्रीकिर्तन महोत्सव
भांगरभूंय । प्रतिनिधी
पेडणें : किर्तन आमची सांस्कृतीक परंपरा आसा. आयज लेगीत आमचें किर्तनकार ती सांबाळपा खातीर प्रामाणीकपणान वावुरतात. गांवागांवांतली देवस्थानां, समाजीक संस्थांनी लेगीत ही कला वाडोवचे खातीर फुडाकार घेवचो, अशें मांद्रेंचे सरपंच राजेश मांद्रेंकार हांणी सांगलें.
दांडोसवाडो मांद्रेंच्या दुर्गादेवी दत्तात्रय सांस्कृतीक मंडळान कला आनी संस्कृती संचालनालयाच्या पालवान आयोजीत केल्ल्या चक्रीकिर्तन महोत्सवाच्या उक्तावण सुवाळ्यांत सरपंच मांद्रेंकार उलयताले. ह्या वेळार माचयेर पंच संपदा आसगांवकार, राष्ट्रीय किर्तनकार सुहासबुवा वझे, कला आनी संस्कृती संचालनालयाचे प्रतिनिधी रिदेश दाभोलकार, दुर्गादेवी सांस्कृतीक मंडळाचे अध्यक्ष मुरारी कलशांवकार आनी थळावे कलाकार सोमनाथ पार्सेकार हाजीर आशिल्ले.
ह्या वेळार जाल्ल्या चक्रीकिर्तन कार्यावळींत बाल – युवा किर्तनकार रामानुज जोशी, सना आठलेकार, सिद्धा पार्सेकार आनी शिवानी वझे हांणी देश, धर्म आनी संस्कृतीचेर आकर्शक पूर्वरंग तशेंच आख्यानां सादर करून हाजीर आशिल्ल्या किर्तनमोगीं कडल्यान शाबासकी मेळयली. तांकां विद्याधर नायक (ऑर्गन), रुद्राक्ष वझे (तबलें) आनी श्रीकृष्ण जोशी (चिपळी) हांणी संगीतसाथ केली. सुहासबुवा वझे हांणी सुत्रसंचालन केलें. मुरारी कलशांवकार हांचे हस्तुकीं सकळ्या किर्तनकारांक तशेंच मानेस्तांक सन्मानचिन्नां भेटयलीं. सचीव शंकर चोडणकार हांणी येवकार दिलो आनी प्रास्तावीक केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
