भांगरभूंय | प्रतिनिधी
म्हजें मत
शांतादुर्गा फातर्पेकान्न देवस्थानान जात्रे वेळार मुस्लीम वेपाऱ्यांक स्टाॅल घालपाक दिवचे नात, असो निर्णय घेतला ही बातमी आनी म्हजे जात्रेंत तुजें कितें काम? हो लेख वाचलो. आतां हेर देवळांच्यो समिती पसून अशी बंदी घालपाक मुखार सरतल्यो. जात्रांक येवपी ८० टक्के वेपारी हे भायले आसतात. तातूंत मुस्लीम कितले आसतात, ताची चवकशी पयलीं करची पडटली.
म्हज्या निरीक्षणा प्रमाण, चडशे भायले वेपारी हे हिंदू. हरियाणा, उत्तर प्रदेश, मध्यप्रदेशांतले. तांचो भेस, उलोवपा वयल्यान ते मुस्लिमां सारकेंच दिसतात. तांचें आधारकार्ड तपासतले? तें बोगस आसल्यार? बोगस दाखले, कार्डां सोंपेपणी मेळटात. पयशे दिल्यार नांव पसून बदलून मेळटा. जात्रांक भायल्यान येतात, ते चडशे वेपारी गरीब, साद्यो वस्तू विकपी. मुस्लिम वेपाऱ्यांचेर बंदी ही फक्त जात्रे पुरतीच काय हेर जाग्यांचेरुय ती घालतले?
देवतेक प्रसाद दाखोवपाक, उपासाक आमी फळां खातात, तीं गोंयांत, हुबळी, बेळगांवां कोण विकतात. बटाट, काजू, पेरां, मिरसांगो, रोजां, तोमाट पुर्तुगेजांनी ब्राझिलांतल्यान गोंयांत हाडले. साबुदाणो हो सॅगो पामाच्या खोडा पसून करतात, तोय पुर्तुगेजांनी भारतांत (तामिळनाडूंत पयलें उत्पादन) हाडलो. हें सगलें खावप पयलीं बंद करचें पडटलें.
होमखण सदरांत गोंयकार वेपाऱ्यांनी जात्रांनी वेपार करचो, म्हणटकच भायले वेपारी येवचे नात, अशें बरयलां तें खरें. वेपारुच कित्याक? जें- जें भायले करतात, तें सगलें गोंयकारांनी करचें. थोड्यो गजाली शक्य नात, तरीय त्यो करपाचो यत्न करचो. देखीक नितळसाणेचीं कामां, रस्ते खणप, टायल्स बसोवप, सिक्युरिटी म्हूण काम करप. आमी ह्या संवसारांत चार दिसां खातीर आयल्यात. केन्ना मरत ताचो नेम ना. हांसून, खेळून जगुया. आंगांत दुस्वास केळयत रावल्यार ताचो परिणाम आमचेच भलायकेचेर जातलो.
– पुरुषोत्तम पं. नायक, पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
