भांगरभूंय | प्रतिनिधी
पर्वरी उड्डाण पुलाचें काम सुरू करतना आशीकुशीच्या पंचायतींक येरादारी संबंदीचो प्रस्न सुटावो करपाक विस्वासांत घेतले, अशें सरकारान जाहीर केल्लें. तें जालां काय ना, तें कळना. पूण सध्या येरादारीचो प्रस्न दिसान दीस घुस्पटत चलिल्लो पळोवंक मेळटा. सांजवेळा स- साडे स उपरांत तर येरादारीची चडूच कोंयडी जावपाक लागल्या. उदरगती खातीर लोकांक सगलें सोंसपाक जाय, ही गजाल खरी, पूण तातूंतय तांकां मात्शी तरी थाकाय मेळटली, हे खातीर सरकारी यंत्रणा आनी बांदकाम कंपनीन सुवर्णमध्य काडपाक जाय. कारण ही समस्या 6- 7 म्हयने न्हय, तर पुराय देड- दोन वर्सां तरी उरतली. इंधन फुकट वतलेंच, पूण ताचे परसूय मोलादीक वेळ पिड्ड्यार जातलो. शारिरीक, मानसीक भलायकेचेर परिणाम जातलो तो वेगळो.
म्हापसा- पर्वरी, करासवाडो – पणजी ह्या रस्त्यान येतात, त्यो चडश्यो गाडयो पणजे वचपी. आशिकुशीच्या गांवांतल्यान करासवाडो, म्हापश्यां येवपी गाडयांचो आंकडो हजारांचे संख्येन आसा. तातूंत उद्देगां खातीर म्हाल, यंत्रां हाडपी, व्हरपी व्हडले ट्रक, कंटेनरूय आसात. तांचेर सध्या बंदी घाल्या. दिवचल, मुळगांव, अस्नोडेंच्यान पणजे वचपी गाडयांचोय रस्तो पर्वरेचोच. एकोशी, पोंबुर्फा, हळदोणें, बिठ्ठोण, मयें ह्या मार्गा वयल्यान बऱ्योच दुचाकी आनी चार चाकी मोटारी येतात. पूण, रस्तो अशीर आशिल्ल्याची कागाळ सगलेच करतात. तेन्ना हे पणजेक जोडपी सगले रस्ते, शाॅर्टकट मार्ग रुंद केल्ले जाल्यार येरादारीक बऱ्याक पडपाचें. आतांय गाडयो त्या मार्गांनी सोडूं येतात. म्हापश्यां आनी आशीकुशीच्या गांवांतल्यान येवपी गाडयो, बसी साळगांव, पिळर्ण, बेतींतल्यान वा सांगोल्डेच्यान पणजे व्हरपाक मेळटा. पूण अंतर मात्शे चड जातलें. पर्वरी टांकये कडल्यान कांय दुचाकी, मोटारी भितर घेवन सरळ सांगोल्डेंच्यान म्हापश्यां व्हरूंक मेळटल्यो. पूण तो रस्तो कांय कडेन अशीर आसा. सध्या दुचाकी, मोटारींनी पर्वरे भितरल्यान वचून पत्रकार नगर वा गोवा बोर्डा कडेन मुखेल रस्त्यार येवप सुरू केलां. व्हडलोसो वेळ वांचना, पूण मनस्ताप जायना.
उड्डाण पुलाचें काम चलता म्हूण येरादारी कांसवा गतीन जाता ही गजाल खरी. पूण ती जावपाक सर्व्हीस रोडूय तितलेच जापसालदार आसात. ह्या रस्त्यांचेर ल्हान- व्हड होंडके, फोंडकुलां पडल्यात, व्हडली खडी, लोबर घालून थोडीं पुरयल्यांत, रस्त्याचेर व्हडली खडी पडल्या, माती आसा. डांबर सोदचें पडटा, मदीं आडवे चर आसात. म्हणटकच एकल्यान गाडी फक्त तीन सेकंद पसून थांबयल्यार, फाटल्यान रोखड्योच स-सात गाडयो तेंकतात. हाचे वयल्यान ह्या मार्गा वयले येरादारीचो अदमास येतलो. तातूंत मदीं गाव, वाड्यां वयल्यान मुखेल रस्त्याचेर येवपी, भितर वचपी गाडयो आसतात. ते खातीर पुलीस येरादारी आडयतात. हाकाय लागून येरादारी तुंबता. सर्व्हीस रस्ते ‘हाॅट मिक्स’ पद्दतीन डांबरी करीत जाल्यार येरादारी बऱ्याच प्रमाणांत सुरळीत जातली. इंधन, वेळ वांचतलो. रस्त्याचे एकेक वटेचें रातचीं 10 ते सकाळीं 6 मेरेन डांबरीकरण करप शक्य ना? माॅल, छत्रपती शिवाजी महाराज पुतळ्या कडलो रस्तो करपाक चड करून एक रात पुरो जातली. उड्डाण पुलाचें कामूय रातचें चलता काय बंद दवरतात, तें कळना. सांजचें साडे स उपरांत थंय कोण दिसनात!!
उड्डाण पुलाचें काम 2026 पयलीं पुराय जातलें. खात्यां मदीं समन्वय नाशिल्ल्यान पुलाच्या कामांत गोंदळ जाला. रस्ते रुंद करप, नवे रस्ते बांदप, येरादारी वेवस्थापन अजून जाग्यार पडूंक ना. 5 डिसेंबरा पयलीं हें जाग्यार घालपाची मुजत तांकां दिल्या, अशें पर्यटन मंत्री आनी थळावे आमदार रोहन खंवटे हांणी म्हणलां. राष्ट्रीय म्हामार्ग मंत्रालय, बांदकाम खातें, वीज खातें, पुलीस, मामलेदार हांची बसका दोन दिसां पयलीं जाल्या. हें काम जाता तितलें बेगीन जाल्यार बरें. कारण पर्यटकांचो आंकडो वाडपाक लागला. पोरणें गोंया वचपी भाविकूय वाडटले. कांय कडेन सर्व्हीस रोड बांदपाचे आसात. त्या वेळार कुशीच्या घरांक, आस्थापनांक भायर- भितर सरपाक वाट दवरची पडटली, वड आसात, ते हालोवचे पडटले. हो मार्ग वापरपी गाडयेकार, प्रवासी, थळावे लोक, भावीक बेजार जावचे नात, हे मतींत घेवन मार्ग काडचो पडटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
