भांगरभूंय | प्रतिनिधी
तरणाट्याक कपडे काडून मारपेट
भांगरभूंय । खबरां संस्था
भोपाळ : मध्य प्रदेशांतल्या कांय घडणुकांनी पुराय देशांत खवदळ घाला. पयलीं सिधी जिल्ह्यांतली मुतपाची घडणूक, मागीर इंदुरांत आदिवासी अल्पवयीन भुरग्यांक निर्दयपणान बडोवप, आतां सागर जिल्ह्यांत एका अनुसूचीत जातींतल्या तरणाट्याक कपडे काडून मारपेट केल्ल्याचो व्हिडियो मुखार आयला. पुलिसांनी पिडेस्ताची वळख पटयल्या. आतां दुबावितांचो सोद चालू आसा.
ही घडणूक 8- 9 ऑक्टोबर 2022 दिसाची. हो व्हिडियो सागराच्या मोतीनगर पुलीस स्टेशनाचे हद्दींतलो. हांगाच्या भोपाळ रस्त्यार धर्मकाटा लागसार कांय जाणांनी त्या तरणाट्याक चोरयेच्या दुबावान धरलो. तांणी ताका एके कुडींत व्हेलो. उपरांत कपडे काडून बडी, दांड्यांनी बडयलो. तो मकारोनिया वाठारांतल्या एका गांवांत रावपी. तो आपली बाजू मांडटालो, पूण दुबावितांक ताका मारप थांबोवंक ना.
ह्या व्हिडियोंत एका तरणाट्याक कपडे काडून वण्टीक तेंकोवन बसयतना दिसता. ताचे दोनूय वटांनी दोन लोक ताका मारतात. ताका दोनूय हात फुडें धरपाक सांगतात. मागीर एक तरणाटो ताका मारता. दुसरो फाटीर मारता.
पिडेस्त आपणाक सोडपाची विनवणी करता. मागीर मारपी लोकांक तो म्हणटा – भय्या, मारात म्हाका जिवेशीं मारात. पूण दुबावीत मारप चालूच दवरतात. ह्या व्हिडियोंत धर्मेंद्राचें नांव आयलां, अशें अतिरिक्त एसपी विक्रम हांणी सांगलें.
सागर घडणुकेक लागून काँग्रेसीन आतां सरकाराचेर टिका केल्या. पक्ष मुखेली कमल नाथ सोमारा सकाळीं आमदारां सयत राज्यपालाक मेळ्ळे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
