भांगरभूंय | प्रतिनिधी
दाडाची वाडी- धारगळे आयतारा रातीं म्हाल येरादारी रिक्षेन एके स्कुटरीक फाटल्यान धपको दिल्लो. ह्या अपघातांत स्कुटर चलोवप्याक मरण आयिल्लें. हो सादो अपघात अशें कोणायकूय दिसपाचें. मात थळाव्या लोकांनी अपघात नेमको कसो जालो, ताची पळोवणी केली आनी हें प्रकरण खुनाचें, असो दुबाव उक्तायलो. आतां पुलिसांनीय हीट अॅण्ड रन अपघाता बदला खुनाचो गुन्यांव नोंद केला. रिक्षा चलोवप्यान स्कुटरीक धपको दिले उपरांत ती 20- 25 मिटर झरकटत मुखार गेल्ल्याचें दिसून आयलां. ह्या प्रकरणांत पुलिसांनी दोगांक अटकूय केल्या. मोहीत कुमार (19) आनी अभिषेक कुमार (20) अशीं अटक केल्ल्यांचीं नांवां. तांच्या नांवां वयल्यान हे दोगूय गोंयकार दिसनात. हे रिक्षा चलोवपी. तांचो आनी स्कुटर चलोवपी देविदास कोनाडकार हांचो अपघाता पयलीं वाद जाल्लो आनी ताचो परिणाम ह्या खुनांत जालो, असो पुलिसांक दुबाव आसा. केस्तांवाचो राग धरून ह्या दोगांयनी रिक्षेन ताचो फाटलाव करून हो अपघात घडोवन हाडलो, असो मुळावो अदमास आसा. तांणी आपलो गुन्यांव मान्यूय केला.
ही खुनशी प्रवृत्ती हाचे पयलीं फक्त हिंदी सिनेमांनीच पळोवपाक मेळटाली. कांय खलनायक नायकाच्या भावाचो बी मोटारीन फाटलाव करीत ताच्या वाहनाक धपको दिताले आनी ताका मारून उडयताले. पळोवपाक हो सदचो अपघात. पुलीस तशीच नोंद करताले. फायल बंद. पूण प्रत्यक्ष जिवितांत पसून अशे अपघात घडल्यात. ते अपघात म्हूण फायलींत सदां खातीर बंद जाल्यात. चुकूनच एखादो खून म्हणून कळ्ळा आसतलो आनी उपरांत चवकशी जाल्या आसतली. मात असले गाडयेन फाटलाव करून मारपाचे प्रकार गोंयांत जाल्ल्याचें कोणे सहसा आयकूंक नासतलें. पयर दाडाची वाडी – धारगळे लोकांक ताची प्रचिती आयली आनी ते हादरले. खंय व्हरून दवरलां आमचें हें गोंय. ह्या दोगूय परप्रांतीयांनी (नांवा वयल्यान तशे दिसतात.) स्वता तिडकी सरशीं हें कृत्य केलां काय हाचे फाटल्यान आनीक कोण आसात, ताचो तपास पुलिसांक करचो पडटलो. कारण हाचे पयलीं भायल्यांक सुपारी दिवन तांचे कडल्यान गुन्यांव करून घेवपाचे बरेच प्रकार गोंयकार गुन्यांवकारांनी केल्यात. कांय प्रकरणां उक्तडारूय आयल्यांत.
गोंयांतले बरेच रोजगार आतां परप्रांतीयांच्या हातांत गेल्यात. तेय प्रामाणीकपणान ते करतात. पूण भायल्यान येतात, ते सगलेच सादे, भोळे आसनात. हाताच्या बोटां प्रमाण, सगलेच मनीस एक सारके नासतात. शंबर लोक आयले जाल्यार तातूंत धा जाण तरी गुन्यांवकार आसतात वा संद पळोवन तांकां गुन्यांव करीन दिसता. ते स्वताचेर नियंत्रण दवरपाक शकनात. तेन्ना ह्या लोकांक भाड्यान दवरप्यांनी चड जाग्रुत रावपाची गरज आसा. तांचो आदलो इतिहास तपासपाक जाय. भाड्याक दवरचे पयलीं तांची नोंद पुलीस स्टेशनाचेर करपाक जाय. तांकां आपल्या वांगडा हाडपी, बिराडाक दवरपी गांवभावानूय हाचो विचार करपाक जाय. कारण तांकां आपूण ज्या मनशाक आपयता ताचो सभाव बेसबरो खबर आसता. तिडक आयल्यार तो कितें करपाक शकता, हाचोय तांकां अदमास आसता. म्हणटकच तांणीय सादूर रावप बरें. गोंयांत नोकरेची, धंद्याची बरी संद आसा म्हूण आपल्या इश्टांक, सोयऱ्यांक गांवांतल्यान आपोवचे पयलीं तांणी चार फावटी विचार करूंक फावो.
पुलिसांचेरूय व्हडली जापसालदारकी आसा. तांणी फाटीं गांवांगांवांनी भोंवून बिगरगोंयकारांची म्हायती एकठांय करपाची मोहीम सुरू केल्ली. त्या वेळार कितलेशेच नांव नोंदणी जावंक नाशिल्ले, वळखपत्र पसून नाशिल्ले कामगार मेळिल्ले. हाचो अर्थ बिराडाक दवरपी निश्काळजी. काय तांकां खबर नासतना बिराडाक राविल्ल्यान आपल्या गांवभावांक हाडून दवरिल्ले? पुलिसांनी ही मोहीम परत चालू करची. न्हय दरेका म्हयन्याक 1-1 तालुक्यांत ती जायत रावची. बिराडाक रावप्याची नोंद जर पुलीस स्टेशनांत ना जाल्यार थंयचे थंय बिराडाक दवरपी घरधनयाक उणोच दोन हजार रुपयांचो दंड दिवचो. गोंयांत फक्त चोरयो, मारामारी करपीच न्हय, तर व्हडले राष्ट्रीय, आंतरराष्ट्रीय नामनेचे गुन्यांवकार येवन रावल्यात. आतंकवादी येवन रावल्यात. हालीं तेंपार तर सट्टो घेवपी खास गोंयांत येतात, बंगलो भाड्यान घेतात आनी चार दीस गुन्यांव करून दुडवांचे पोटले सयत सुसेगाद पळ काडटात. धरले जाल्यार चोर नातर साव!
दाडाची वाडी- धारगळें जें कितें जालें, तें भिरांकूळ म्हणचें पडटलें. ह्या 19, 20 वर्सां पिरायेच्या पोराट्यांच्यो तकल्यो ज्या नेटान धांवल्यो, त्याच वेगान जाग्रुत लोकांक लागून तांच्या हातांत बेडयो पडल्यो. आतां ह्या प्रकरणाचो बेगीन तपास करून गुन्यांवकारांक कडक ख्यास्त दिवची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
