भांगरभूंय | प्रतिनिधी
बेतोड्यां काल सकाळीं स्कुटरी वयल्यान वचपी तरणाट्याचेर एकल्यान फाटल्यान दुचाकी वयल्यान येवन फार मारलो आनी तो पळून गेलो. सचीन कुट्टीकार हाच्या हाताचेर गुळी लागल्या. सध्या तो जीएमसींत उपचार घेता. गोंयकारांक धक्को दिवपी ही गजाल. हाचे आदीं फारपेट जावंक नात, अशें न्हय. पूण तांकां गँगवाॅर, खंडणीची फाटभूंय आशिल्ली. हो प्रकार वेगळो दिसता. पुलिसांच्या मतान, हाचे फाटल्यान प्रेमप्रकरण आसपाक शकता. तीन म्हयन्यां पयलीं झगडीं, हल्लो जाल्लो. ते नदरेन पुलीस तपास करतात. सांज मेरेन हल्लेखोर मेळूंक नाशिल्लो. आतां प्रेम प्रकरण, इश्टांचीं सादी झगडीं, मारामारी, वाड्यां वयलीं केस्तांवां, मान-पाना वयल्यान जाल्लो तणाव….. अशा कारणांक लागून जर गोंयकार पिस्तुलां भायर काडपाक लागले, जाल्यार काळ बदल्ला अशें म्हणचें पडटलें. परिस्थिती बदल्ल्या आनी भिरांकूळ जाल्या. फार मारपी गोंयकार काय कोणाक सुपारी दिल्ली, ताचीय चवकशी पुलीस करतात.
गोंयकार तशे झगडाळ मनीस न्हय. अन्याय जाल्यारूय तोंड धांपून ओग्गी रावपी. अर्थांत आडवाद आसात. पूण, देशांतल्या कांय राज्यांनी साद्या – साद्या कारणां वयल्यान रोखडोच फारपेट जाता. बलात्कार, खून जाता. तसले प्रकार गोंयांत दिसनात. म्हणल्यार आयज मेरेन तरी दिसूंक नात. कांय जाल्यात, पूण तातूंत गोंयकार चुकूनच दिसल्यात. आतां ही परिस्थिती तशीच उरतली काय, हाचो हुस्को जाता. काळा वांगडा मनीस बदलता. ताचो सभाव, वृत्ती बदलप मात ताचे खातीर धोक्याचें थारूं येता. बेतोडेंच्या रस्त्यार सकाळच्या वेळार पाळत दवरून त्या हल्लेखोरान सचिनाचो फाटलाव केलो आनी फार मारून पळून गेलो. थंय सीसीटीव्ही कॅमेरो आशिल्लो. नेमको हल्लो जाला थंयच तो दिसता. पूण, तो बंद आशिल्लो. सीसीटीव्ही कॅमेरे दर खेपे टिकेचो विशय थारपाक लागल्यात. रिचार्ज करूंक नाशिल्ल्यान तो बंद आशिल्लो, अशी म्हायती थळाव्या लोकांनी पत्रकारांक दिल्या. पंचायत ताची देखरेख करता. तांणी पयशे भरूंक नाशिल्ले, असो हाचो अर्थ जालो. कांय गरजेच्या गजालीं कडेन आतां स्वराज्य संस्था आडनदर करपाक लागल्यात. पंचायत संचलनालयानूय हातूंत लक्ष घालपाक जाय. सरकारान हे बाबतींत संबंदितांचे कान पिळचे. गोंयांत आतां सगलेच कडेन सीसीटीव्ही कॅमेरे आसात. (कांय लोकांनी पसून आपल्या घरा भायर बसयल्यात.) ते 24 वरां चलपाक जाय. खास करून दर्या वेळो, गाडयो भरून व्हांवतात ते रस्ते. हांगां गुन्यांव, अपघात घडपाची चड भिरांत आसता.
हालींच्या तेंपार मोगाचीं प्रकरणांय वाडपाक लागल्यात. मोबायल फोनाचें तातूंत व्हडलें योगदान आसा. मोग हो पवित्र आसता, तातूंत वेळ आयल्यार त्यागूय करचो पडटा. मात, कांय मोगी वा तांचे लागींचे दुसऱ्यांच्या जिवार उठ्टात वा ते मोगी स्वताचो जीव सोंपयतात. सिनेमा आनी नाका जाल्लें सगलें मोबायलाच्या रुपान आतां हाताच्या तळटार आयलां. जाय तेन्ना जाय तें पळय. ताचोय परिणाम नवे पिळगेचेर जाला. फुडाराक चड जातलो. सारासार विचार करपाची कुवतूच आयज उणी जावपाक लागल्या. सिनेमांनी, टिव्ही माळांनी दिसता तो मोग फटीचो, तें नाटक, हें वयांत येवपी पिळगेक समजावन सांगपाक आमी खंय तरी कमी पडपाक लागल्यात. शाळांनी समुपदेशक आसतात. तांणी फक्त विद्यार्थ्यांच्यो समस्याच आयकून घेवच्यो न्हय, तर तांकां ह्यो असल्यो गजालीय सांगच्यो. तरणाट्यांच्या मुखार आशिल्ले धोके, हांयसां विशींय तांकां समुपदेशन करचें. कारण ही पिराय पांय निसरपाची आसता.
अपघात, गुन्यांवाच्यो दोन तरी बातम्यो सद्दां वाचूंक, आयकूंक, पळोवंक मेळटात. ही बऱ्याची गजाल न्हय. कायदो आनी सुवेवस्था काबार जावपाचे वाटेर आसा, अशें विरोधी पक्ष फुडाऱ्यान म्हणलां. तातूंत तथ्य ना, अशें म्हणपाक मेळचें ना. कारण, घडणुको तर घडटात. पुलिसांची जापसालदारकी वाडल्या. पूण सगलेंच तांच्या माथ्यार थापूंक मेळचें ना. समाजानूय गुन्यांवां पसून पयस रावपाक जाय. गोंयचे राहणीमान खूबच वयर पावलां. ताका लागून उणी ऐपत आशिल्ले दुसऱ्या कडेन सर्त करपाक लागल्यात. कायदेशीर मार्ग आपणावन जिवीत सुदारप शक्य आसा. पूण झटपट पयसो जोडून गिरेस्त जावपाक जायते जाण बेकायदेशीर मार्गांचेर चलतना दिसतात. घुंवळे वखदां, शिंदळकी, गुन्यांवकारी, जमीन माफिया…. हातूंत आतां नीज गोंयकारूय आडकुपाक लागल्यात. हो चुकीचो मार्ग तांणी सोडूंक फावो…. आनी आतां हें फारपेट प्रकरण. पुलिसांनी बेगीन ताचो सोक्षमोक्ष लावचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
