किताब जिखपाक भारत इत्सूक

भांगरभूंय | प्रतिनिधी

भारत आनी ऑस्ट्रेलिया ह्या पंगडां मदीं आयच्यान धी ओव्हल मैदानाचेर संवसारीक टॅस्ट वस्तादपण सर्तीची फायनल सुरू जातली. संवसारीक टॅस्ट वस्तादपण सर्तीक 2019 सावन सुरवात जाली. पयली फायनल 2021त भारत आनी न्युझिलॅण्ड ह्या पंगडां मदीं जाल्ली. त्या वेळार न्युझिलॅण्डान वस्तादपण जोडिल्लें. 2021 सावन सुरू जाल्ले दुसरे वस्तादपण सर्तींत भारत आनी ऑस्ट्रेलिया ह्या पंगडांनी गुणतकट्यांत पयल्यो दोन सुवातो मेळयिल्ल्यो. ताका लागून तांचे मदीं फायनल जातली.

बॅटिंग विभागाचेर नदर मारली जाल्यार भारता परस ऑस्ट्रेलियेची बॅटिंग फळी घटमूट दिसता. अंदूंच्या हंगामांत ऑस्ट्रेलियेच्या चार बॅट्समनांनी एक हजारा परस चड धांवड्यो केल्यात. जाल्यार भारताच्या एकाय बॅट्समनाक अंदूंच्या हंगामांत एक हजार धांवड्यो करपाक जमूंक ना.

अंदूंच्या हंगामांत सगल्यांत चड धांवड्यो करपी पांच बॅट्समनांंत दोन ऑस्ट्रेलियेचे आसात. उस्मान ख्वाजान 1608 आनी मार्नस लाबशेनान 1509 धांवड्यो केल्यात. उस्मान ख्वाजान दर पांचव्या डावांत एक शेंकडो मारला.

भारता वतीन सगल्यांत चड धांवड्यो चेतेश्वर पुजारान केल्यात. पूण, सगल्यांत चड धांवड्यो करपाचे वळेरेंत तो 19वे सुवातेर आसा. पुजारान सरासरीन दरेक 30 डावांनी एक शेंकडो मारला. जाल्यार दरेक पांचव्या डावांत एक अर्द शेंकडो मारता.

ओव्हल मैदानाचेर ऑस्ट्रेलियेच्या स्टिवन स्मिथान बरी बॅटिंग केल्या. ताणें तीन मॅचींनी 97.75चे सरासरीन 391 धांवड्यो केल्यात. मार्नस लाबशेना वांगडा स्मिथ पोरूं कावण्टी क्रिकेटींत लेगीत खेळ्ळा. हाचो पंगडाक फायदो जावपाक शकता. पूण, ऑस्ट्रेलियेच्या बॅट्समनांचें उणाकपण म्हणल्यार स्पिन बॉलिंग. ऑस्ट्रेलिये आड सगल्यांत चड विकेटी घेवपाच्या टॉप 5त आर आश्विन (25 विकेटी) पयले सुवातेर, रवींद्र जडेजा (22 विकेटी) दुसरे आनी श्रीलंकेचो प्रभात जयसुर्या (12 विकेटी) पांचवे सुवातेर आसा.

दुसरे वटेन भारताच्या बॅट्समनांचें उणाकपण म्हणल्यार फास्ट बॉलिंग. भारता आड सगल्यांत चड विकेटी फास्ट बॉलरांनी घेतल्यात. पूण, भारता आड सगल्यांत चड विकेटी स्पिनर नॅथन लायन आसा. लायना उपरांत सगल्यांत चड विकेटी चार फास्ट बॉलरांनी घेतल्यात. हातूंत दक्षीण आफ्रिका आनी इंग्लंड ह्या पंगडांचे दरेकी चार बॉलर आसात.