भांगरभूंय | प्रतिनिधी
नवी दिल्ली, खबरां संस्था ः शाकाहारी खाणां- जेवणाचे वळेरेंत दुद आनी दुदाचे पदार्थ हांचो आस्पाव केलो तरी भारतांतल्या 10 भारतीयांतले 3 परस उणे भारतीय शाकाहारी आसात.
भारत हें शाकाहारी राष्ट्र न्हय
चडशे भारतीय लोक तांतयां, मांस वा नुस्तें खातात. राष्ट्रीय कुटुंब आनी भलायकी सर्वेक्षण-V (2019 21) च्या आंकडेवारी प्रमाण 29.4% बायलां आनी 16.6% दादल्यांनी अशें सांगलें की तें केन्नाच नुस्तें, चिकन वा मांस खायनात. 45.1% बायलां आनी 57.3% दादल्यांनी सांगलें, सप्तकांतल्यान एक फावट तरी नुस्तें, चिकन वा मांस खातात.
मांसाहारींचो आंकडो वाडटा
खरें म्हणल्यार NFHS IV (2015-16) प्रमाण भारतांत मांसाचो वापर वाडत आसा अशें आंकडेवारींतल्यान दिसून येता. 29.9% बायलां आनी (खास करून) 21.6% दादल्यांनी ह्या सर्वेक्षणांत सांगिल्लें की तें केन्नाच नुस्तें, चिकन वा मांस खायनात. 42.8% बायलां आनी 48.9% दादल्यांनी सप्तकांतल्यान एक फावट तरी नुस्तें, चिकन वा मांस खाता अशें सांगिल्लें.
NFHS IV आनी NFHS V हांच्या डेटाची तुळा करून पांच वर्सांच्या अंतरान हो डेटा एकठांय केलो. केन्नाच नुस्तें, चिकन वा मांस खावंक नाशिल्ल्या बायलांचो आंकडो 1.67% उणो जालो आनी केन्नाच नुस्तें, चिकन वा मांस खावंक ना अशें सांगपी दादल्यांचो आंकडो तब्बल 23% उणो जालो. त्याच वेळार सप्तकांतल्यान एक फावट तरी नुस्तें, चिकन वा मांस खावपी बायलांचो आंकडो 5.37% वाडलो आनी नुस्तें, चिकन वा मांस खावपी दादल्यांचो आंकडो 17.18% वाडलो.
लॅक्टो- शिवराक आनी प्रादेशिक बदल
NFHS V आंकडेवारी प्रमाण जे स्वताक शिवराक म्हणटात तें लेगीत चडशे लॅक्टो- शिवराक आसतात, म्हळ्यार ते गाय आनी म्हशीं कडल्यान मेळिल्लें दूद आनी दुदाचे पदार्थ खातात. फकत 5.8% बायलां आनी 3.7% दादल्यांनी केन्नाच दूद पियेलें ना वा धंय खाल्लें ना अशें सांगलें. 48.8% दादले आनी बायलो दर दिसा दूद पितात वा धंय खातात अशें सांगलें. 72.2% बायलां आनी 79.8% दादल्यांनी सप्तकांतल्यान एक फावट तरी दूद पियेतात वा धंय खातात अशें सांगलें.
दुदाचेर चड खर्च
घरगुती वापर खर्च सर्वेक्षण 2022-23 च्या आंकडेवारी प्रमाण दुदाचो वापर शिवराक घटकां कडेन संबंदीत आसा अशें दिसता जे लोक चड प्रमाणांत दूद आनी दुदाचे पदार्थ खातात ते उणें वा कयलेंच मांस खायना. खरें म्हणल्यार भारतांत दूद हो मांसा परस पोशक पर्याय. वट्ट 14 राज्यां आसात जंय दुदाचेर दर मनशा फाटलो म्हयन्याचो खर्च (MPCE) नुस्तें, मांस वा तांतयां परस चड आसता आनी 16 राज्यां आसात जंय उरफाटें जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
