भांगरभूंय | प्रतिनिधी
नवी दिल्ली, खबरां संस्था : जेन्ना मनीस खंयचेय संस्थेंत काम करपाक लागता तेन्ना कर्मचार्यांक कांय सुविधा मेळटात. नोकरेचे सुवातेर आसपी ह्या सुविधां मदीं पगार सोडल्यार हेर म्हत्वाचे निकश आसतात, जे कर्मचार्यांचेर सरळ परिणाम करतात. हातूंत सुटयो, प्रॉव्हिडंट फंड, मेडिकल इन्शुरन्स, ग्रॅच्युइटी हाचोय आसपाव आसता.
वयलो दरेक घटक म्हत्वाचो, नोकरेच्या जाग्यार कर्मचार्यां खातीर हे घटक एका स्वरुपांत आदाराचेंच काम करतात. हातुंतल्या ग्रॅच्युइटी विशीं हालींच सर्वोच्च न्यायालयान म्हत्वाचो निर्णय दिला. हाका लागून नोकर वर्गाक धक्को बसपाक शकता.
ग्रॅच्युइटी म्हणल्यार एक असो निधी वा रक्कम जी कंपनी कडल्यान खंयच्याय कर्मचार्यां खातीर लागू जाता. थारावीक वर्सां वा जायतीं वर्सां कंपनींत केल्लें काम आनी दिल्ल्या योगदाना विशीं कंपनी वतीन कर्मचार्याक दिवपी अर्थीक स्वरुपांतली भेट म्हणल्यार ग्रॅच्युइटी. सोंप्या उतरांनी सांगचें जाल्यार जायत्या नोकरदारां खातीर ग्रॅच्युइटी हो निवृत्ती उपरांतचो आधार. म्हणल्यार काळा प्रमाण निवृत्तीची संकल्पना जरी बदलता तरी ग्रॅच्युइटीचें म्हत्व मात उणें जावंक ना.
काम करपी दरेक व्यक्ती ह्या निधी खातीर पात्र आसता असोच जायत्या जाणांचो समज. मात, हाचे मुखार हें गणीत बदलूंक शकता. कारण, सर्वोच्च न्यायालयाची स्पश्ट भुमिका. हांगाच्यान फुडें कांय प्रकरणांत कर्मचार्यांची ग्रॅच्युइटी जप्त करपाक शकता. सर्वोच्च न्यायालयाच्या निर्णया प्रमाण हे धर्तेचेर कर्मचारी आनी धनयां मदल्या नेमांत व्हड बदल केला.
सर्वोच्च न्यायालयाचो निर्णय कितें?
सर्वोच्च न्यायालयान १७ फेब्रुवारीक दिल्ल्या निर्णया प्रमाण ग्रॅच्युइटी कायदो १९७२ खाला, कर्मचार्यांची ग्रॅच्युइटी जप्त करपा खातीर गुन्यांवकारी ख्यास्त गरजेची ना. थोडक्यांत एखाद्या कर्मचार्याक नोकरेच्या जाग्यावेल्यान नैतीक भ्रश्टाचाराच्या म्हणल्यार खंयच्याय अनैतीक, चुकीच्या वा फटींगपणाचें काम अश्या वा हांतल्याय खंयच्याय एका कारणाक लागून भायलो रस्तो दाखयलो, जाल्यार ताची ग्रॅच्युइटी आडावपाचो अधिकार कंपनीक आसा. हे खातीर न्यायालयांत गुन्यांव सिद्ध करपाची गरज ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
