भांगरभूंय | प्रतिनिधी
मूत्रपिंड हो कुडींतलो एक म्हत्वाचो अवयव. कुडींत जमिल्ली घाण काजून उडोवपाचे काम मूत्रपिंड करता. देखून मूत्रपिंड निरोगी दवरल्यार भलायकी बरी उरता. कुडीक निरोगी दवरपा खातीर दरेक अवयव सारकें काम करप खूब गरजेचें. मूत्रपिंड रगत फिल्टर करपाचे काम करता. देखून मूत्रपिंड निरोगी दवरपा खातीर भरपूर उदक पियेवप गरजेचें. उदक पियेल्यार मूत्रपिंडाचें कार्य सुदारता आनी कुडींत जमिल्ले विखारी पदार्थ काडून उडोवपाक मजत करता. तशेंच अवयव योग्य काम करपा खातीर अन्न आनी उदक गरजेचें आसा. खास करून मूत्रपिंडांचें काम सुदारपाखातीर फावो त्या प्रमाणांत उदकाची गरज आसता.
मूत्रपिंडाचे भलायके खातीर फावो तें उदक पियेवप चड गरजेचें. कारण ताका लागून डिहायड्रेशन टाळता आनी मूत्रपिंड संबंदीत जायत्या दुयेंसांचो धोको उणो जाता.
उदक उणें पियेल्यार …
मूत्रपिंडाक कार्यक्षमतेन काम करपाक उदकाची गरज आसता. जेन्ना कुडींत उदकाचो उणाव जाता तेन्ना डिहायड्रेशन जाता आनी ताचो सरळ परिणाम मूत्रपिंडांचेर जाता. हाका लागून हानीकारक कोयर कुडींत एकठांय जाता आनी ताका लागून मूत्रपिंडांक लुकसाण जावंक शकता. उदक कमी पियेल्यार किडनी स्टोन, युरिनरी ट्रॅक्ट इन्फेक्शन (UTI), मूत्रपिंड अपेशी जावपाचो धोको वाडटा.
कितलें उदक पियेवचें?
भलायकी तज्ञांच्या म्हणण्या प्रमाण, निरोगी मनशान दिसाक सुमार 3-4 लिटर वा 8-10 ग्लास उदक पियेवचें. पूण पिराय, कामाचे प्रकार, हवामान आनी शारिरीक गरजेप्रमाण हे प्रमाण बदलू येता. फावो त्या प्रमाणांत उदक पियेवप मूत्रपिंडाचे भलायके खातीर फायदेशीर थारता.
कितें जतनाय घेवची?
मूत्रपिंडाचे दुयेंस आशिल्ल्या लोकांनी दोतोराच्या सल्ल्यान उदक पियेवपाचे प्रमाण मर्यादीत करचे. मूत्रपिंड अपेशी जाल्ल्या वा डायलिसीस करपी लोकांनी उदक उणें पियेवचें. कारण चड उदक पियेल्यार मूत्रपिंडांचेर दबाव येवंक शकता. अशा लोकांनी वैजकी सल्ल्या बगर उदकाचे प्रमाण वाडोवंक फावना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
