भांगरभूंय | प्रतिनिधी
जीएमसींत केल्ल्या अभ्यासांतली म्हायती
भांगरभूंय । प्रतिनिधी
पणजी : गोंय वैजकी म्हाविद्यालयांत (जीएमसी) दाखल जाल्ल्या दुयेंतीं मदीं क्रॉनीक किडनी दुयेंसा खातीर सीकेडी) मुख्य कारण गोडेमूत आनी उच्च रक्तदाब आशिल्ल्याचें मुखार आयलां. जीएमसीच्या नेफ्रोलॉजी विभागान केल्ल्या एका अभ्यासांतल्यान ही म्हायती मेळ्ळ्या. हे खातीर विभागांत दाखल जाल्ल्या 345 दुयेंतींचो अभ्यास केल्लो. तातूंत 214 उत्तर गोंयांतले जाल्यार 131 दक्षीण गोंयांतले दुयेंती आशिल्ले.
अभ्यासांतले म्हायती प्रमाण वट्ट सीकेडी दुयेंतींतले 51 टक्के दुयेंतीं मदीं हें दुयेंस जावपा फाटलें गोडेमूत कारण आशिल्लें. ते उपरांत उच्च रक्तदाब, क्रॉनीक ग्लोमेरूलोनेफ्राईटीस, क्रॉनिक नेफ्रेटीस, मुतखडया संबंदात दुयेंस आनी दूख उणी करपी वखदांचो वापर तशेंच हेर कारणांचो आस्पाव आशिल्लो. दक्षीण गोंयांतल्या वट्ट सीकेडी दुयेंतींतल्या 29 जाणां मदीं ह्या दुयेंसाचें कारण कळूंक ना. तातूंतले 22 दुयेंती काणकोण म्हालांतले आशिल्ले. हे दुयेंती नुस्तेमारी वा काजी वा सुपारीच्या कुळागरांत काम करताले.
बार्देस म्हालांतल्या गोडेमुताक लागून 56 टक्के दुयेंतींक किडणीचें दुयेंस जाल्ल्याचें स्पश्ट जाल्लें. जाल्यार क्रॉनिक नेफ्रेटीसाक लागून 18.65 टक्के तशेंच दूख उणी करपी वखदांचो वापर करपी 15.25 टक्के दुयेंती आशिल्ले. काणकोण म्हालांतल्या सीकेडीच्या कारणांचो अभ्यास करचे खातीर गोंय विद्यापिठान कृती दल समितीची स्थापना केल्या. समितींत जीएमसींतल्या दोन दोतोरांचो आस्पाव आसा.
डायलेसीस करपी दुयेंतींत वाड
मेळिल्ले म्हायती प्रमाण फाटल्या चार वर्सांत जीएमसींत डायलेसीस करपी दुयेंतींत वाड जाल्या. 2021-22 त डायलेसीस करपी 234 दुयेंती आशिल्ली. 2024-25 त ही संख्या वाडून 305 जाली. तातूंतले सगल्यांत चड 63 दुयेंती हे साश्टी म्हालांतले आशिल्ले. जाल्यार फोंडें म्हालांतले 44, बार्देसांतले 34 दुयेंती आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
