भांगरभूंय | प्रतिनिधी
सां जुझे दी आरियलाच्या धी किंग्स स्कुलान गोंय क्रिकेट असोसिएशनाचे 16 वर्सां पिराये सकयले दिलीप सरदेसाय करंड शालेय क्रिकेट सर्तींत दक्षीण विभागीय वस्तादपण जोडलें.
फायनलींत ताणें वास्कोच्या सेंट जोसेफ इन्स्टिट्यूटाक 6 विकेटींनी हारयलें. धी किंग्स हायस्कुलाच्या जैतांत लेग स्पिनर जय कांगुरी आनी आराध्य गोयल पर्जळ्ळे. जय कांगुरीन हॅट्रिके सयत सात विकेटी घेतल्यो. जाल्यार आराध्य गोयलान 82 धांवड्यांची खेळी केली.
फायनल मडगांव क्रिकेट क्लबाच्या डॉ. राजेंद्र प्रसाद स्टेडियमाचेर जाली. सेंट जोसेफ इन्स्टिट्युटाचो डाव 197 धांवड्यांचेर सोंपलो. तांचे वतीन द्विज पालयेंकारान सगल्यांत चड 78 धांवड्यो केल्यो. जयान 35 धांवड्यांनी 7 विकेटी घेतल्यो.
धी किंग्स स्कुलान 34वे ओव्हरींत वस्तादपण जोडलें. ताणें 4 विकेटी वगडावन 198 धांवड्यो केल्यो. आराध्यान 95 बॉलांनी णव चवक्यांचे मजतीन 82 धांवड्यो केल्यो. ताचे खेरीत शमीक कामतीन 43 बॉलांनी सात चवक्यांचे मजतीन 49 धांवड्यो केल्यो.
इनाम भेटवण सुवाळ्याक गोंय क्रिकेट असोसिएशनाचे जोड सचीव रुपेश नायक, ज्युनियर क्रिकेट निवड समितीचे वांगडी महेंद्र नायक, सर्त समन्वयक अजीत गांवकार उपस्थीत आशिल्ले.
थोडे भितर धांवतकटोः सेंट जोसेफ इन्स्टिट्यूट, 44.5 ओव्हरींनी सगले बाद 197 धांवड्यो (द्विज पालयेंकार 78, सुजय परमेकर 30, प्रथमेश कदम 18 धांवड्यो, जय कांगुरी 7-35, व्यंकट चिगुरुपती 2-24, रुद्राक्ष मनचंदा 1-50) हार आड धी किंग्स स्कूल, 33.3 ओव्हरींनी 4 बाद 198 धांवड्यो ( आराध्य गोयल 82, शमीक कामत 49, जय कांगुरी 15 धांवड्यो, सार्थक शेटगांवकार 2-34, सार्थक तोरसकार 1-37, शिवराज लकुंडी 1-18)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
