भांगरभूंय | प्रतिनिधी
दुनिया झुकती है झुकानेवाला चाहीए, अशें म्हणटात. चड करून दुसऱ्यांक तोपी घालपी ठकसेनांचे बाबतींत हीं उतरां वापरतात. कितलोय सादूर रावलो तरी एका खिणाक बेसाव जावन मनीस करूंक जायना तें करून बसता. दिल्लींत दोन दिसां पयलीं एक घडणूक घडल्या. कचेऱ्यांक सुरक्षा वेवस्था दिवपी कंपनीचो हो संचालक आपले कंपनीक मात सुरक्षा दिवपाक शकलो ना. सायबर चोरांनी ताका तोपी घाली. 50 लाखांची. तीय फक्त, काॅल, मिस्ड काॅल आनी ब्लँक काॅल दिवन!! ओटीपी मागिनास्तना हें कर्म तांणी केलें. देश आनी राज्य पांवड्या वयल्या सायबर पुलिसांनी झुजा पांवड्याचेर आॅनलायन सेवा सुरक्षीत करपाक जाय. नाजाल्यार हे भिकाड्डे लोक आपल्याच देशभावांक चुनो लायत रावतले.
नेमकें घडलें कितें ? फटवणूक जाल्या त्या मनशाक सांजवेळा सात ते पावणे णव मेरेन फाटोफाट काॅल आयले. तातूंतलें कांय ताणें घेतले. कोण उलयना म्हूण उरिल्ले घेवंक नात. उपरांत फोन तपासून पळयत जाल्यार आरटीजीएस (रिएल टायम ग्रोस सेटलमेंट) पद्दतीन 50 लाख ट्रान्स्फर केल्यात. तातूंतले 12 लाख, साडेचार लाख, 10-10 लाख आनी हेर वेव्हार अनवळखी खात्यांचेर जाल्यात. सगली हाथ की सफाई फक्त देड वरां भितर. ह्या खातेधारकांनी आपल्या खात्यांची म्हायती त्या ठकसेनांक दिल्ली आसतली. तांणी पयशे पयलीं तांच्या खात्यांचेर घालून उपरांत दुसरे कडेन ट्रान्स्फर केल्या आसतले, अशें पुलिसांक दिसता. बँकेंतल्यान तशी सट करून व्हडली रक्कम काडपाक मेळना. मात हो करंट अकावंट. पुलिसांच्या मतान, ‘टू- स्टेप आॅथेंटिकेशनांत कांय दोश आसात. ताचो वापर करून वा ‘सिम स्वॅप’ तंत्रज्ञान वापरून ही चोरी केल्या. खातेदाराक फक्त मॅसेजी येतात. ताणें कागाळ केली आनी पयशे परत मेळ्ळे, अशें सहसा जायना. हांगा फक्त काॅल करून कसो आॅनलायन दरोडो घाला, तें कळना. मोबायल हॅक करून पॅरलल लायनी वयल्यान ओटीपी उखल्ला आसुंये.’ मोबायल फोनाचेर वेव्हार करपी लोकांनी कितली सादुरताय बाळगुची पडली, तें ह्या प्रकारा वयल्यान कळटा. आतां तर कंपनींच्या हुबेहुब लोगों सयत मॅसेजी येतात. म्हणजे खरें कितें आनी फट कितें, तें चार- पांच पदव्यो घेतिल्ल्यांक पसून कळचें ना. अशिक्षितांची तर गजाल सोडाच!
सध्या पुलिसांक हो प्रकार झारखंडांतल्या जामताडा (संथाली भाशेंत जामा म्हणल्यार सोरोप आनी ताड म्हणल्यार घर) जिल्ह्यांतल्यान केला, असो दुबाव मारला. हांगां सोरोप खूब मेळटात. तांचे वांगडा एक से बढकर एक सायबर गुन्यांवकारुय आसात. तातूंतल्या अडिचशे वयर लोकांक अटकूय जाल्ली. मात, बंदखणींतल्यान सुट्टकच तांणी परतून तीच वाट आपणायल्या आसतली. ह्या नांवाची गुन्यांव माळूय फाटीं नेटफ्लिक्सार चलताली. आमच्या देशांत दर 32 सेकंदांनी एक आॅनलायन हल्लो जाता. हालींचे आंकडेवारी प्रमाण, तेलंगणांत 10 हजारां वयर जाल्ल्यात. मागीर उत्तरप्रदेश, कर्नाटक (दरेकी आठ ते णव हजार), महाराष्ट्र, आसामांत सादारण पांच- पांच हजार…..!! आनी हाचे मुखार हातूंत उणाव जावपाची शक्यताय ना. कारण मोबायल फोनाचेर अर्थीक वेव्हार करपी लोकांचो आंकडो वाऱ्याच्या वेगान वाडत आसा. तशे ते वेव्हार सुरक्षीत आसात. मात, फक्त मिस्ड काॅल दिवन पयशे चोरप म्हणल्यार अतीच जालें. सायबर तज्ञां परस हे सायबर चोर चड हुशार म्हणचें पडलें!
राज्य, केंद्रीय सरकारी खातीं मेळत थंय मोबायल क्रमांक घेतात. कितेंय कळोवपाक तो बऱ्याक पडटा ही गजाल खरी. पूण बँक खात्यांक जोडिल्ल्यान तो खंयच्यान ना खंयच्यान तरी ठकसेन, तोपीमास्टरांक मेळटाच. सगल्याच बँकांनी आतां मोबायल नंबराची सक्ती आसा. ठकसेन जितले आधुनिक जायत आसात, ताचे परस चड वेगान सरकारी सुरक्षा यंत्रणेक, सायबर पुलिसांक अत्याधुनिक जावचें पडटलें. ह्या गैरप्रकारांक आळाबंद घालचो पडटलो. नाजाल्यार पेपरलेस काम, वेव्हार करपाची सरकारी येवजण गुठलावची पडटली. आॅथेंटिकेशन, कोड, ओटीपी, 2-2 फावटीं पासवर्ड मारपाक लावप, अशे सुरक्षेचे उपाय नामनेच्यो आॅनलायन कंपनीं घेतात. पूण तरीय आमच्या जामताडाच्या गांवगिऱ्या वाठारांतले लोक तांकां हातोहात फटयतात. लोकांक तोपी घालपाचो हो जुमला तांचे फीन तकलेंत कसो कितें किल्लता काय?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
