भांगरभूंय | प्रतिनिधी
धामीचीं दुयेंसां केन्ना पातळत तें कोणूच सांगपाक शकना. कोरोनाचो अणभव आमचे सयत पुराय संवसारान घेतला. ताका लागून शक्य जाता तितले आमी सादूर रावंक जाय. पोरूं कुटबणा नुस्तेमारी जेटीचेर आॅगस्टांत काॅलेरान धुमशेणां घाल्लीं. थळावे सोडल्यार कोणाक कांय खबरूच नाशिल्लें. मागीर खबरो भायर आयल्यो. देडश्यां वयर लोकांक ताचो संसर्ग जाल्लो. ट्राॅलरांचेर काम करपी चाळीशेक कामगारांक हाॅस्पिटलांत घालचे पडले. पांच जाणांक मरण आयिल्लें. अंदुंय कुटबण, मोबोर, केळशी वाठारांत काॅलेरा पातळपाची भिरांत आसा. स दुयेतीं मेळ्ळ्यात. कागदपत्रांचे सोपस्कार करीनासतना भलायकी, नुस्तेमारी खातें, पंचायतींनी थंय वचून तपासणी करपाक जाय. मोबोर केळशे जेटीचेर उदकाची, शौचालयांची वेवस्था करची, कामगारांचे भलायकेची तपासणी करची, अशी मागणी सरपंचान केल्या. नुस्तेमारी हंगाम अजून सारको सुरूय जावंक ना, तातूंत हें संकश्ट. पोरूंं जें जालें, तें परत नाका.
नुस्तेमारी बंदी (?) लागू जाली काय भायले कामगार घरा वता आनी दोन म्हयन्यांनी परत येतात. हवा, उदक, आहार बदलिल्ल्यान तांची भलायकी इबाडटा. तरीय पोटा खातीर ते परत येतात. मागीर दुयेंसां पातळात. गोंयकारांक हें नवें न्हय. पयलीं बांदकाम कामगार हाका जापसालदार आशिल्ले. तशें हांगां डेंग्यू दुयेंस गोंयकारां मदींच पातळटा. पूण आंकडो उणो आशिल्ल्यान कांय भायर सरना. मात एकठांय रावपी कामगारांक रोखडोच संसर्ग जाता आनी धडाधड 30, 40, 60, 70 असो दुयेंतींचो आंकडो वाडत वता. हाका कांय प्रमाणांत तांकां हाडपी काॅण्ट्रेक्टर, नुस्तेमारुय जापसालदार आसात.
हालींच म्हालेखापालाचो कामगार कल्याणा संबंदीचो अहवाल विधानसभेंत मांडलो. तातूंत 2018 ते 2022 काळांत नोंद जाल्ल्या 51 रियल इस्टेट आस्थापनांनी कामगार सुरक्षा, भलायकी धोरण तयार करूंक ना, अशें म्हणलां. कायद्यांत हाची सक्ती आसा. कितेंय सुरु करतलो जाल्यार लायसन्स घेवचेंच पडटा, तशेंच हें. ह्या सगल्यां कडेन पन्नासा परस चड कामगार आसात. कांय वर्सां पयलीं कामगाराक भलायकी कार्ड दिवचें अशी सरकारान सक्ती केल्ली. तेन्ना मलेरिया पातळटालो. थोड्यांनी दिलें, थोड्यांनी काणोदोळो केलो. कित्याक अशें जाता? सरपंच, आमदार, मंत्री, खात्याचो संचालक म्हजो इश्ट, म्हाका भिवपाची गरज ना, म्हूण कांय वेवसायीक, धंदेकार चुकीचीं पावलां उडयतात काय? केळशी जेटी, फातोड्ड्यांच न्हंय तर बरेच कडेन नुस्तें चडोवपाक, देंवोवपाक बंदी आसा. मात दिसता कितें? ट्रक, टेंपो खंयूय येवन रावता नुस्तें देंवयता, ताचें उदक थंयच रस्त्यार तुंबून उरता, हें नुस्तेमार खलाशी, कामगार, विक्रेते, थळावे नागरीक सगल्यांचे भलायकेक मारक. पंचायतीन केळशे उदक, सुरक्षा रक्षक नेमल्यात. नितळसाणेचे निर्देश दिल्या. बोट धनयांनी आपल्या कामगारांचे भलायकेची जतनाय घेवंक जाय. स्वता सरकारी यंत्रणेन कामगारां कडेन उलोवन तांचे प्रस्न समजून घेतल्यार बरे. कारण कांय दुयेंसां तितल्या वाठारा पुरतीं मर्यादीत उरनात, तीं मागीर खंयचे खंय पातळटात.
काॅलेरा पातळूंक जायना म्हूण बुडबुडे काडून थंड केल्लें वा क्लोरिन गुळयो घालून नितळ केल्लेंच उदक पिवपाक जाय. जेवणय धांपून दवरूंक जाय. तेलकट, मसाल्याचें, बेळशेल्लें अन्न खांवंक जायना. जेवणाच्यो, च्यावेच्यो थारावीक वेळो आसात, त्यो पाळच्यो. जेवचे पयलीं, संडासा उपरांत साबू लावन हात धुवचे. घाणयारें उदक, नुस्त्याचो कोयर सदांच नितळ केल्यार बरो. तो न्हंयेत, दर्यांत रकोवंक जायना. कामगारांचे भलायकेची नेमान तपासणी जाय. ट्राॅलरांच्यो वा जेटी वाठारांतल्यो उदकाच्यो टांकयो, संडास नितळ जाय. बोटधनी नुस्तेमारांक भलायकी जतनायेची म्हायती दितात? दुयेंसाची धाम येता आनी पंदरा दिसांनी ना जाता, म्हणून कोणे हात कंवळून बसचें न्हय. हें भिरांकूळ थारूं येता!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
