भांगरभूंय | प्रतिनिधी
अडवय सत्तरींतली घडणूक; महाराष्ट्रांतल्या एकल्याक अटक
भांगरभूंय । प्रतिनिधी
वाळपय : बिरेस्तारा रातच्या 9 वरांच्या सुमाराक अडवय सत्तरींत कासाक गेल्ल्या दोगां मदल्या एकल्याक फार लागून मरण आयलें. ह्या प्रकरणांत महाराष्ट्र दोडामार्गा वयल्या अभिजीत नारायण देसाय हाका वाळपय पुलिसांनी अटक केल्या.
मेळिल्ले म्हायती प्रमाण कासा खातीर वापरिल्ल्या आर्माक परवानो नाशिल्ल्याचें स्पश्ट जालां. वाळपय पुलीस हे संबंदांत अदीक तपास करतात. शुक्रारा सकाळीं फॉरेन्सीक पंगडान घडणुकेचे सुवातेर वचून वेगवेगळे तरेचे नमुने एकठांय केल्यात. ताची तपासणी करून हे संबंदांत अदीक म्हायती मेळटली असो अदमास वाळपय पुलिसांनी उक्तायला.
दिवचल पुलीस उपअधिक्षक जिवबा दळवी हांणी दिल्ले म्हायती प्रमाण बिरेस्तारा रातच्या 9 वरांच्या सुमाराक हेमंत हिरबा देसाय (33. रा. देसायवाडो अडवय) आनी अभिजीत नारायण देसाय (34. रा. थडलेवाटला दोडामार्ग, महाराष्ट्र) हे दोगूय कासा खातीर अडवय सावन लागींच आशिल्ल्या रानांत गेल्ले. कासाची पूर्वतयारी करतना अभिजीत देसाय हाचे कडल्यान नकळटा आर्माचो चाप ओडलो आनी फार सुटलो. ह्या वेळार मुखार आशिल्ल्या हेमंत हिरबा देसाय हाच्या हड्ड्याक फार लागलो.
गंभीर जखमी जावन रगतान माखिल्ल्या हेमंताक ताकतिकेन वाळपय सरकारी समाजीक हॉस्पिटलांत दाखल केलो. त्या वेळार वैजकी अधिकाऱ्यान ताका मरण आयिल्ल्याचें घोशीत केलें.
हे विशींची कागाळ हेमंत देसाय हांच्या चुलत्यान पुलीस स्टेशनार दिले उपरांत पुलिसांनी घडणुकेचे सुवातेर वचून परिस्थितीची पळोवणी केली. वासपूस केले उपरांत अभिजीत देसाय हाका चवकशे खातीर ताब्यांत घेतलो. ताचे कडल्यान म्हायती मेळ्ळे उपरांत प्रथमदर्शी अभिजीत देसाय दोशी आशिल्ल्याचें स्पश्ट जाले उपरांत ताका अटक केली.
पोस्टमार्टमा उपरांत हेमंताची कूड ताच्या घरच्यांचे सुवादीन दिली.
कासा खातीर वापरिल्लें आर्म वाळपय पुलिसांनी ताब्यांत घेतल्या. तशेंच हेमंताक हॉस्पिटलांत व्हरपा खातीर वापरिल्ली दुचाकी लेगीत पुलिसांनी ताब्यांत घेतल्या. तेचवरी साबार वस्तू ताब्यांत घेतल्या, अशी म्हायती सुत्रां कडल्यान मेळ्ळ्या. वाळपय पुलीस स्टेशनाचे निरिक्षक विदेश शिरोडकार ह्या प्रकरणांत दिवचल पुलीस उपअधिक्षक जिवबा दळवी आनी उत्तर गोंय पुलीस अधिक्षक अक्षत शर्मा हांच्या मार्गदर्शना खाला फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
