भांगरभूंय | प्रतिनिधी
वॉशिंगटन, खबरां संस्था: भारतीय वंशाचे काश पटेल हांच्या अमेरिकेंतल्या फेडरल ब्युरो ऑफ इनव्हेस्टिगेशन म्हळ्यार एफबीआय हे गुप्तचर संस्थेच्या संचालक पदार नियुक्तीक अमेरिकन सिनेटान मंजूरी दिल्या. काश पटेल हे अमेरिकेचे अध्यक्ष डोनाल्ड ट्रम्प हांचे कट्टर समर्थक म्हणून वळखतात. सिनेटांत जाल्ल्या मतदाना मजगतीं काश पटेल हांकां एफबीआयचे फुडले संचालक नियुक्त करपा वटेन ५१ मतां, जाल्यार तांचे आड ४९ मतां पडलीं. रिपब्लिकन पक्षाच्या सुसान कॉलिन्स आनी लिसा मक्रोव्स्की हांणीय डेमोक्रॅटीक पक्षाच्या वांगडा पटेल हांचे नियुक्ती आड मत दिलें.
डोनाल्ड ट्रम्प हांणी अध्यक्ष पदाची वेंचणूक जिंकले उपरांतूय पटेल हांचे कडेन एफबीआयची जापसालदारी दितले अशी घोशणा केल्ली. आतां हाचेर सिनेटानूय शिक्को मारलो. काश पटेल हांचे भारतांतल्या गुजराता कडेन संबंद आसात. पटेल हांणी ह्यान पयलीं डिफेंडर आनी न्याय विभागात दहशतवाद विरोधी अभियोक्ता म्हणून काम केलां.
एफबीआय संचालक म्हणून काश पटेल हांचो कार्यकाळ १० वर्सांचो आसतलो. ट्रम्प हांणी अध्यक्षपदाचो पदभार स्वीकारचे पयलीं क्रिस्टोफर रे हांणी राजिनामो दिल्लो. आतां तांची सुवात काश पटेल हांणी घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
