भांगरभूंय | प्रतिनिधी
वाराणसी, खबरां संस्था : वाराणसीच्या काशी विश्वनाथ देवळाच्या भक्तांक बोगस वेबसायट तयार करून फटयल्यात. दर्शन, आरती, रुद्राभिषेकाच्या नांवा खाला तांणी भक्तांक 10 लाख रुपया मेरेन फटवणूक केल्या. भक्तांनी देवळा कडेन संपर्क केलो तेन्ना हो प्रकार उजवाडाक आयलो. उपरांत काशी ट्रस्टाच्या सीईओन डीजीपी कडेन कागाळ केली. चवकशी खातीर पुलिसांनी सायबर तज्ञांचो आदार घेतला.
पुलिसांच्या म्हणण्या प्रमाण श्रावणाच्या वेळार देश- विदेशांतले हजारांनी भक्त दर्शना खातीर काशी विश्वनाथाक पावतात. देवळाच्या नांवान एक बनावट वेबसायट तयार करून सायबर गुन्यांवकारांनी बुकींग करपाक सुरवात केली. हातूंत रुद्राभिषेका वांगडा दर्शन, पूजा, आरती खातीर बुकींग केल्ली. सध्या श्रावणाच्या निमतान देवळाच्या मुखेल संकेतथळार सगळ्या तरांची बुकींग बंद आसा.
भक्तांक कळचें ना अशे तरेन फटोवप्यांनी बनावट वेबसायट तयार केली. वेबसायटीक भेट दिवप्यांक थेट संपर्क करपाचो पर्याय दिला. बनावट वेबसायटीचेर लॉग ऑन केल्या उपरांत भक्तान आपलो नंबर घेतलो आनी ते पयशे थेट ताच्या खात्यांत घाले. लिंक आयले बरोबर सायबर गुन्यांवकारय नवे अॅप अपलोड करतात.
हाचे भायर तुमी बनावट वेबसायटीचेर क्लिक करतकच मुखेल पान उगडटलें. हांगा पूजा बुकींगाचेर क्लिक करतना थळाव्या पंडिता कडेन संपर्क सादचो अशें बरयलां. हाचे भायर 091- 09335471019/ 09198302474 अशे 2 मोबायल नंबरय दिल्ले आसात. हो ठग पंडिताच्या नंबराचेर ऑनलायन पयशेय मागतालो.
काशी विश्वनाथ देवळाची मूळ वेबसायट https://www.shrikashivishwanath.org/ आसा. सध्या श्रावणाच्या निमतान सगल्या तरेच्यो बुकींग बंद आसात.
देवळाचे सीईओ विश्वभूषण मिश्रान डीजीपी प्रशांत कुमार आनी पुलीस आयुक्त मोहित अग्रवाल हांकां पत्र बरयलां. देवळाची बनावट वेबसायट डिलीट करून गुन्यांवकारांचेर कारवाय करची अशी मागणी केल्या. काशींत येतना दर्शन सोडून हॉटेलां, बोटी, भोंवडे, प्रवास, विमान आनी थळाव्या टॅक्सींचीय बुकींग वेबसायटीचेर सुरू आसा अशें तांणी सांगलें. तशेंच पयल्या क्लिकाचेर क्रमांक घेवन एजंट ऑफलायन पुराय म्हायती दितात.
फेसबूक पेज 3 म्हयन्यां आदीं हॅक जाल्लें
देवळाचें फेसबूक पेज 3 म्हयन्यां आदीं हॅकर्सांनी हॅक केल्लें. तशेंच हॅकर्सांनी पेजाचो पासवर्ड बदलून अश्लील पोस्ट अपलोड केल्ले. पूण आयटी पंगडान पोस्ट डिलीट करून 1 वरां भितर पेज परत मेळयलें.
देवळाचें 58 कोटी उत्पन्न
श्रीकाशी विश्वनाथ देवळ प्रशासनान 3 म्हयन्यां आदीं उत्पन्नाचो आंकडो जाहीर केल्लो. फकत 2022- 23 वित्तीय वर्सा 2019, 2020 आनी 2021 वर्सा परस चड पयशे मेळ्ळे अशें देवळ प्रशासनान सांगिल्लें. 2022-23 वर्सा 58 कोटी 51 लाख रुपया परस चड पयशे एकठांय जाले. तेच बरोबर हो कॉरिडोर बांदचे पयलीं तीन वर्सांत एकठांय येणावळ सुमार 57 कोटी रुपया आशिल्ली. कॉरिडोर बांदल्या उपरांत देवळाचें उत्पन्न 200% वाडलां. 2021- 22 वर्सा जोड 80.93%, 2020-21 वर्सा उणे 58% आनी 2019-20 वर्सा उणे 0.81% आशिल्ली.
चारधाम – बद्रीनाथ, केदारनाथ, गंगोत्री आनी यमुनोत्री ह्या नांवान देशांत हेर खंयचेंय देवूळ वा ट्रस्ट बांदचे नात. नांवां देवळां सारकीं आसलीं तरी खर कारवाय जातली. उत्तराखंडाचे मुख्यमंत्री पुष्कर सिंग धामी हांच्या अध्यक्षतेखाला 18 जुलयाक जावपी मंत्रीमंडळ बसकेंत हे विशीं कायदो करपाचो निर्णय घेतला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
