भांगरभूंय | प्रतिनिधी
५१८ गाडयो काडिल्ल्यो कावलाक
पणजी : सरकारी कार्यालयां भायर रस्त्यार पार्क करून दवरिल्ल्यो गाडयो सगल्यां खातीर त्रास दिवपी थारतात. त्यो कोण वापरिनात. तशेंच तीं कार्यालया भायर वा रस्त्यार पडून आशिल्ल्यान येरादारी खातीर आडमेळें थारतात. मात मुख्यमंत्री डॉ. प्रमोद सावंत हांणी स्क्रॅप मेळाव्यांचें आयोजन करून पेड्ड्यार जाल्ल्या वाहनांचे त्रास उणे करपाचो यत्न केला. ह्या बऱ्या उपक्रमाक लागून रस्त्यार तशींच पडून आशिल्लीं वाहनां पयस जालीं तशेंच सरकाराकूय २.७७ कोटींची येणावळ मेळ्ळी.
विवीध सरकारी खात्यां कडेन बरींच वाहनां जायतीं वर्सां जालीं पडून आशिल्लीं. वापरप शक्य नाशिल्लीं १५ वर्सां जावन गेल्लीं वाहनां भंगारांत काडटात. हाका लागून निविदा जारी करतात. ही प्रक्रीया बरीच कटकटीची आशिल्ल्यान तिका बरोच वेळ वता. कालवां अड्ड्यांतल्या गाडयांचो विलो लावपा खातीर सरकारान सात म्हयन्यां पयलीं स्क्रॅप मेळावे आयोजीत करपाचो निर्णय घेतलो. गोंय कोयर वेवस्थापन महामंडळा वतीन हे मेळावे घेतले. आतां मेरेन चार स्क्रॅप मेळावे जाल्यात. हातूंत दुचाकी, चारचाकी मेळून ५१८ गाडयो भंगारांत काडल्यांत. हातुंतल्यान सरकाराक २.७७ कोटींची येणावळ मेळिल्ल्याची म्हायती अर्थ खात्याचे जोड सचिव प्रणव भट्ट हांणी दिली.
हाचे मुखारुय हो उपक्रम चालीक लावचो, अशी मागणी लोकां कडल्यान जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
