भांगरभूंय | प्रतिनिधी
उत्तर प्रदेशांत 22 जुलयाच्यान काँवर (कावड) यात्रा सुरू जातली. जंय शंकराचीं देवळां आसात, थंय आपल्या गांवांतल्यान कावडीन उदक घेवन चलत वचप आनी शिवलिंगाक अभिषेक करप असो हो उत्सव. देशाच्या कांय राज्यांनी भावीक ही प्रथा पाळटात. पूण उत्तराखंड, उत्तर प्रदेशांत म्हयनोभर चलपी हे पवित्र कावड यात्रेंत लाखांनी भावीक वांटेकार जातात. बोल बम बम भोले असो जप करीत ते हरिद्वाराक वचून शिवशंभूक उदकाचो अभिषक करतात. वाटेर लोक तांच्या जेवणाची, रावपाची वेवस्था करतात. श्रावणबाळान जाण्ट्या आवय- बापायक कावडीन बसोवन तिर्थयात्रा घडयली. संत एकनाथ काशींतल्यान कावडींत हाडिल्लें गंगाजल रामेश्वराक अभिषेका खातीर व्हरताले. वाटेर तांकां मरपाक तेंकिल्लें गाडव पडिल्लें दिसलें आनी तांणी व्रत भंग जातलें हो विचार करिनासतना तें उदक ताका पिवयलें. ही कावड यात्रा वादांत सांपडल्या, ताका कारण जालां, उत्तर प्रदेश सरकारान घेतिल्लो एक निर्णय. उत्तर प्रदेशांतल्या कावड मार्गा वयल्या सगल्या दुकानदारांनी, हातगाडेकारांनी दुकानांचेर स्वताचें नांव बरोवचें असो आदेश मुख्यमंत्री योगी आदित्यनाथ हांणी दिला. कावड यात्रेची पवित्रताय राखपा खातीर आमी हो निर्णय घेतला अशें सरकाराचें म्हणणें.
सगल्यांत पयलीं मुझफ्फरनगर पुलिसांनी दुकानदारांक दुकानांच्या भायर तांचीं नांवां बरोवपाचे आदेश दिल्ले. दुकानदाराचो धर्म कळटलो आनी कावड भक्तां मदीं संभ्रम निर्माण जावचो ना, असो युक्तिवाद तांणी केल्लो. विशेश म्हणल्यार सगल्या दुकानदारांनी, हातगाड्यांचेर फळां विकप्यांनी आपलें नांव आशिल्ले तकटे लायले. आतां, भाजप विरोधी पक्षांनी हाचेर खर प्रतिक्रिया दिल्यात. कांय जाणांक ही हुकुमशाय दिसता, तर कांय जाणांक नाझींची याद जाली. थोड्यांक हो समाजीक गुन्यांव दिसता, तर उरिल्ल्यांक तो मुस्लिमांचेर अर्थीक बहिश्कार दिसता. जाणकारांच्या मतान, कावड मार्गाचेर मुस्लिमांचींच चड दुकानां आसात. हाचे पयलीं बाघराच्या एका योग शिकोवपी स्वामीन मुस्लीम दुकानांचेर नांवां बरयनात जाल्यार खर आंदोलनाची शिटकावणी दिल्ली. तातूंत आठ दुकानांक हिंदू देवांचीं नांवा आशिल्लीं, अशेंय तांणी सांगिल्लें. खरें म्हणल्यार असले नांवां दवरपाचे प्रकार हेर कडेनूय आसात. भारतांतल्यान बीफ (म्हशीचें मांस) निर्गत करपी 2- 3 व्हडल्या कंपनींचीं नांवां अरबी (अल कबीर, अल हम्द…) आसात. पूण, एकल्याचोय धनी मुस्लीम न्हय. नांवांत कितें आसा, अशें नाटक सम्राट शेक्सपियरान म्हणलांच.
उत्तर प्रदेश सरकाराच्या ह्या नांवां बरोवपाची सक्ती करपी निर्णयाक लागून दोनूय वटेनच्यान प्रतिक्रिया येवपाक लागल्यात. कावड यात्रेकरू हे पवित्र तीर्थ घेवन धर्मीक विधी करपाक वतात. तांणी दुसऱ्या धर्माच्या मनशाच्या दुकानांतलें अन्न, फळां खालीं जाल्यार ताचें व्रत मोडटलें. हलाल केल्लें सामान विकतात, ताका कोण हरकत घेनात? अशें समर्थकांक दिसता जाल्यार विरोधक म्हणटात, फळांक, अन्नाक कसलो धर्म? कांय जनावरांक धर्मीक गटांनी वांटून घाल्यांत, तशीं फळांकूय घाल्यांत काय? म्हणल्यार आपोल हो मुस्लीम आनी आंबो हो हिंदू? यात्रेकरुंनी वांगडा शिधो घेवन येवचो आनी वाटेर अन्न शिजोवन खावचें, अशें थोड्यांक दिसता. तर कांय जाणांच्या मतान सरकारान तांच्या जेवणाची वेवस्था करची. समर्थकांच्या मतान हो निर्णय योग्यूच आसलो आनी विरोधकांक तो चुकीचो दिसलो तरी समाजीक शांतिकाय इबाडपाची शक्यताय न्हयकारपाक येना. कारण उत्तर प्रदेश हें तशें संवेदनशील राज्य म्हणचें पडटलें. कारण हांगा धर्मीक मिरवणुकी वेळार तणाव जाल्ल्याच्यो जायत्यो घडणुको घडल्यात. दोन समाजां मदीं वाद जावचो ना, हाचीय जतनाय प्रशासनाक घेवची पडटली. घडये आतां न्यायालय ह्या निर्णय प्रकरणांत हस्तक्षेप करूंक शकता.
द. आफ्रिकेंत कांय वर्सां पयलीं मेरेन काळ्या लोकांक भेदभावाची वागणूक मेळटाली. नेल्सन मंडेला आनी हेर जायत्या जाणांनी बंदखण भोगली, मार खाल्लो, हीन वागणूक सोंसली. पूण आंदोलन चालूच दवरलें. अखेरेक हो कायदो रद्द जालो. जर्मनीचो हुकुमशा हिटलर तर ज्यूंक सोंपोवपाकूच सोदतालो. ताणें तें केलेंय बी. ज्यूंच्या घरांचेर X अशी खूण मारप आनी ताका मागीर धरून व्हरप. संवसाराक तिसऱ्या म्हाझुजांत धुकलपी हिटलरा विशीं सगल्यांक खबर आसतलेंच. उत्तर प्रदेशांतल्या ह्या नांवाचे तकटे लावपाच्या निर्णयाक लागून समाजमन खुबळ्ळां. पूण दुसरे वटेन थोड्यांक मनां सावन खोस जाल्या. राष्ट्र प्रथम, अशें केंद्र सरकार म्हणटा. आमी पयलीं भारतीय. हिंदू, मुस्लीम मागीर. दरेकल्यान हें मतींत दवरपाक जाय. राजकारणांत धर्म हाडपाक जायना आनी धर्मांत राजकारण. संविधानान सगल्या भारतीयांक स्वातंत्र्य दिलां. आमी सगले भाव- भयणी, आमी सगले एक अशेंय तें म्हणटा. कावड यात्रा शांतिकायेन जावची, हीच भोले शंकरा कडेन प्रार्थना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
