भांगरभूंय | प्रतिनिधी
सर्वोच्च न्यायालयांत सुनावणी सुरू, तीन सरकारांक नोटीस
नवी दिल्ली, खबरां संस्था : कावड यात्रा मार्गा वयल्या सगल्या दुकानदारांनी आपल्या नांवाचो तकटो भायर लावचो, हो उत्तरप्रदेश सरकाराचो वादग्रस्त आदेश सर्वोच्च न्यायालयान शुक्रार मेरेन स्थगीत केला. न्यायालयान उत्तरप्रदेश, मध्यप्रदेश आनी उत्तराखंड सरकाराक हे विशीं नोटिसूय धाडल्या. हे विशींचे याचिकेचेर न्यायालयांत सुनावणी सुरू जाल्या. कावड यात्रा बरे भशेन जावची आनी कसलोच गोंदळ जावचो न्हय, म्हूण सरकारान हो निर्णय घेतिल्लो. मात हाचेर विरोधकांनी खर टिका केल्ली. एनडीए सरकारांतल्या दोन मंत्री आनी नितीशकुमार हांच्या युनायटेड जनता दलानूय ह्या निर्णया विशीं हुस्को उक्तायिल्लो.
कांवरियांनी (यात्रेकरू) मुस्लिमांच्या दुकानांतल्यान कांयच घेवचें न्हय, हे खातीर सरकारान हो निर्णय घेतला, असो गंभीर आरोप एमआयएमचे फुडारी ओवेसी हांणी केल्लो.
हो निर्णय शुक्रार मेरेन स्थगीत दवरचो, अशी नोटीस सर्वोच्च न्यायालयान उत्तरप्रदेश, उत्तराखंड आनी मध्य प्रदेश सरकाराक काडल्या. जर कोणे ताका विरोध केलो, जाल्यार पुलिसांनी कारवाय करची. अन्न विक्रेत्यांक धनी, कर्मचाऱ्यांचीं नांवां दाखोवपाची कोणाकूच सक्ती करपाक दिवची न्हय अशेंय आदेशांत म्हणलां.
न्यायाधीश हृषिकेश रॉय आनी न्यायमूर्ती एस व्ही एन भट्टी हांच्या खंडपिठानय आयज दनपारां कांय खर निरिक्षणां नोंद करीत, हो आदेश दिला. ‘कांवरियांक तांच्या आवडी प्रमाण शाकाहारी जेवण मेळटलें हाची खात्री करपाची परवानगी अधिकाऱ्यांक आसा. तशेंच नितळसाणेचें मानक सांबाळचें’ अशें निरीक्षण नोंद केलां.
कसलोच कायदेशीर आदार नासतना जर सरकारी निर्देशाची अंमलबजावणी करपाक परवानगी दिली तर भारतीय प्रजासत्ताकाच्या धर्मनिरपेक्ष चारित्र्याचें उल्लंघन जातलें, अशें न्यायालयान म्हणलां.
जेवण आनी रेस्टॉरंटांनी कोण रांदतात आनी सेवा दितात हाचेर सकाळीं युक्तीवाद जाले. ‘तुमी मेनूचेर आदारून रेस्टॉरंटांत वतात, कोण सेवा दिता ताचेर आदारून न्हय. सरकारी आदेशाक लागून कोण रांदता ताची वळख कळटली. आमी संविधानांत कल्पना केल्या त्या भारतीय प्रजासत्ताक तें हें न्हय.’ अशें याचिकादारां वतीन हजर आशिल्ले वरिश्ठ वकील अभिषेक सिंघवी हांणी म्हणलें.
‘हिंदू लोकांनी चलयल्लीं ‘शुद्ध शाकाहारी’ रेस्टॉरंटां खूब आसात. पूण तातूंत मुसलमान कर्मचारी आसूं येतात. हांव थंय जेवचो ना अशें म्हणूं येता? कारण जेवणाक तांचो खंय तरी ‘स्पर्श’ जाता. अशें पयलीं केन्नाच जावंक ना. ताका संविधानीक फाटबळ ना. खंयच्याच कायद्यान हें करपाक पुलिसांक अधिकार दिवंक नात, अशें सिंघवीन म्हणलें.
हांव केरळांत आसतना थंय हिंदू आनी मुस्लिमाचें शिवराक हाॅटेल आशिल्लें. हांव मुस्लिमाच्या हाॅटेलांत वतालों. कारण थंय आंतरराष्ट्रीय दर्जाचें जेवण मेळटालें, अशें न्या. भट्टी हांणी फकांडांनी सांगलें.
यात्रा सुरू
मजगतीं, उत्तर भारतांत श्रावण म्हयनो आयच्यान सुरू जाल्ल्यान कावड यात्रेकरू हरिद्वाराक येवपाक लागल्यात. लाखांनी कांवरियां भाविक गंगेचें उदक घेवन घरा वतात. वाटेर शंकराच्या देवळांत त्या उदकान अभिशेक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
