काळीज रडोवपी व्हिडियो

भांगरभूंय | प्रतिनिधी

आदल्यो गजाली परत झरयत बसप योग्य न्हय. हाचे मुखार ताका कसो सावरपाचो, स्वताच्या पांयांचेर कसो उबो करपाचो, हाचो विचार जावंक जाय.

सोशल मिडियाचेर दोन दिसां पयलीं व्हायरल जाल्लो एक व्हिडियो काळीज रडोवपी आसा. परिस्थिती मनशाचेर कसलो वेळ हाडटा वा जिवितांत कांय कारणांक लागून मनशाचें कितें हाल जातात, ताचेर उजवाड घालपी हो प्रसंग. सगल्यांनी ताचे पसून बोध घेवपा सारको. मनशाचे दीस घुंवपाक (वायट अर्थान) वेळ लागना. पूण जें जालां तें दुखदिणें. पळोवप्यांक अस्वस्थ करपी.
हो व्हायरल व्हिडियो आदलो क्रिकेट खेळगडो विनोद कांबळीचो. गुरू रमाकांत आचरेकर हांच्या पुतळ्याच्या लोकार्पणा वेळार जाल्ल्या सुवाळ्यांत दुसरे वटेन बशिल्लो इश्ट सचीन तेंडुलकार ताका हडकुपाक वता. खीणभर विनोद ताका वळखना. वळख पट्टा तेन्ना तो ताचो हात घट्ट धरता. दुकांनी भरिल्ल्या दोळ्यांनी सचीनाक पळयत, कितें तरी उलयता. इतल्यान कुशीक बशिल्लो एक मनीस येता आनी कांबळीचो हात सोडोवन सचीनाक वचपाक सांगता. कांय वेळान विनोद ‘सर जो तेरा चकराए और दिल डुबा जाये, आजा प्यारे पास हमारे काहे घबराए…’ हें तांचे इश्टागतीक वा घडिल्ल्या प्रसंगाक लागपी गीत गायता. कांबळीचे भलायकी विशीं सोशल मिडियाचेर सगल्यांनीच हुस्को उक्तायला. 1983 त संवसारीक करंड जिखिल्ल्या भारतीय पंगडान कांबळीक अर्थीक मजत दिवपाचें उतर दिलां. कपील देव त्या पंगडांतले फास्ट बाॅलर बलविंदर संधू हांचे कडेन उलयल्यात. जर कांबळीची पुनर्वसन केंद्रांत वचपाची तयारी आसा, जाल्यार आमी अर्थीक मजत करपाक तयार आसात. पूण कांबळीन पयलें पावल उखलपाक जाय. तो थंय गेलो जाल्यार उपचार कितलेय म्हयने चलूं आमी खर्च करपाक तयार आसात, अशें कपीलान आपल्याक म्हणलें, अशें संधून प्रसार माध्यमांक सांगलां. त्या पंगडान आदले क्रिकेट खेळगडे सर्गेस्त अंशुमन गायकवाड हांकां हालींच मजत केल्ली.
1993 त विनोद कांबळीन आपले तिसरे टेस्ट मॅचींत इंग्लंडा आड 224 धांवड्यो काडल्यात. फुडले झिम्बाब्वे आडचे मॅचींत ताणें 227 धांवड्यो काडल्यो. तीन डावांनी तीन शेंकडे मारपी तो तेन्नाचो एकसुरो खेळगडो. 54.20 सरासरीन तो 17 टेस्ट मॅची खेळ्ळो. पिरायेच्या 23 व्या वर्सा ताका टेस्ट क्रिकेट सोडची पडली. वनडे मॅचीय तो खेळ्ळा. ताचो खेळ सचीना परस चड आकर्शक आशिल्लो. मात उपरांत क्रिकेटी परस तो हेर गजालींक लागूनच चड गाजलो आनी हेंच ताच्या जिविताक मोडण दिवपी थारलें. ताणें व्हडल्या कंपनीं खातीर जायराती केल्यात. क्रिकेट अकादमी काडल्या. बिग बाॅस सयत टिव्ही माळो, सिनेमांनी ल्हान भुमिकाय केल्यात. हेच मजगतीं ताका सोऱ्याचेंय वेसन लागलें आसतलें. नोव्हेंबर 2013 त ताका काळजाचो आताक आयलो. तेन्नाच्यान ताची जीण दोरी तुटिल्ल्या पतंगा भशेन भरकटत आसा.
आदलो अंपायर, विनोदाचो इश्ट मार्कुस कुटो हांच्या मतान, ‘ 14 फावटी वसईच्या पुनर्वसन केंद्रांत ताका व्हेला. कालचे कार्यावळी वेळार तो पियेवंक नाशिल्लो. ताणें फाटलें वर्सभर सोरो पिवंक ना. सचीनाक मेळिल्ल्यान तो भावूक जालो इतलेंच. ताची भलायकी बरी नासता. ताका लागून तो पियेल्ले सारको दिसता.’
हो व्हिडियो पळयत जाल्यार ताची मानसीक भलायकी हालिल्ल्याचें दिसता, अश्यो शेंकड्यांनी प्रतिक्रिया सोशल मिडियाचेर आयल्यात. पूण ताचे परस चड सचीनाचेर टिका जाल्या. विनोदाचो हात सोडून तो गेलो, आपल्या इश्टाचें ताका कांयच पडून गेल्लें ना, ताणें ताका मजत करूंक ना…. अशें जायतें बरयलां. थोड्यांनी हाका जातीय मोडणूय दिलां. सोशल मिडिया हो उक्त्यार कपडे धोपटपाचो धोबीघांट जाला हें परतून एकदां सिद्ध जालां. सचीनाचो घट धरिल्लो हात कांबळीचे कुशीक बशिल्लो मनीस सोडयता आनी सचीनाक थंयच्यान वच म्हूण सांगता. चड भाशण नाका, शाॅर्ट कट मार, अशेंय तो कांबळीक सांगता. हाचे फाटल्यान कितें तरी कारण आसतलेंच. सचीन क्रिकेट मळाचे तेंगशेर पावलो तरी ताचे पांय जमनिरूच उरले, उरफाटे जुंवानपणांत विनोदाक ते येश पेलवलें ना. ते विशीं खूब कितें दिसाळीं, टिव्ही खबरां चॅनलांनी उलोवन, बरोवन जालां. त्यो आदल्यो गजाली परत झरयत बसप योग्य न्हय. हाचे मुखार ताका कसो सावरपाचो, स्वताच्या पांयांचेर कसो उबो करपाचो, हाचो विचार जावंक जाय. ताकाच न्हय, तर समाजांत असले कितलेशेच विनोद कांबळी आसात. एका काळार ते यशाच्या, पयशांच्या पाळण्यांत धोलताले, आयज तांची विचारपूस करपी पसून कोण नात. फुडलो चलतना फातराक आपटलो जाल्यार फाटल्यान सादूर जावंक जाय, अशें म्हणटात. जुवानपणान चुको जाल्यो, पांय निसरलो आनी मनीस तातूंतल्यान सावरूंक ना जाल्यार ताचे पुराय जिणेचो विनोद जावपाक वेळ लागना, हेंच खरें.