भांगरभूंय | प्रतिनिधी
पणजी : सध्या गोंय बरेंच तापलां. उश्णतायेचें प्रमाण वाडतूच आसा. उश्णतायेचो त्रास जावचो न्हय म्हणून राज्य सरकारान नागरिकांक भलायकेची जतनाय घेवपाचो उलो मारला. सध्या भायर बरेंच वत आनी गरमी जावपाक लागल्या. दिसान दीस वाडपी तापमानाक लागून हाचो परिणाम भलायकेचेर जावपाची शक्यताय आसता. कांय विशिश्ट मळावेले कामगार वताची पर्वा करिनासतना वतांत राबतात. हाका लागून उश्णतायेचो झटको लागपाची सगल्यांत चड शक्यताय आसता. सदांच भोंवपी कामगार वर्गानूय काळजी घेवप गरजेचें.
ल्हान भुरगीं, गुरवार बायलां, खेळगडे, सेगीत वतांत काम करपी मनशां, काळजाचें दुयेंस आशिल्ले लोक, फुप्फुसाचे विकार, किडणीचे विकार आशिल्ल्यांक मात्शी चड काळजी घेवची.
उश्णतायेचो झटको लागपाचीं कारणां
चड वतांत शरिरीक श्रमाची, आंग मेहनतीचीं आनी कश्टाचीं कामां करप, कारखान्याच्या बॉयलर रुमांत काम करप, चड तापमानाचे कुडींत काम करप, घट्ट कपड्यांचो वापर करप, अशा प्रत्यक्ष उश्णताये कडेन वा तापमानांतले वाडपी परिस्थिती कडेन सेगीत संपर्क आयिल्ल्या उश्णतायेचो झटको बसूं येता.
उश्णतायेचीं लक्षणां
मळमळप, ओकूंक येवप, हाता पांयांत गुळे येवप, थकप, सेगीत ९७ टक्के (फॅरेनहायट) परस चड ताप येवप, कांत गरम जावप आनी सुकी पडप, मात्शी तांबडी जावप, घाम येवप ना, डि-हायड्रेशन, घुंवळ येवप, कसलीच उमेद नासप, तकली दुखप, छातयेंत धडधडप, ब्लड प्रेशर वाडप, मानसीक अस्वस्थताय, बेशुद्ध जावप, घुंवळ येवप आनी जायतीं आसात.
उपाय
भरपूर उदक पियात. जरी तान लागूंक ना तरी दर अर्द वरान उदक पियात. घरा भायर सरतना तकली धांपपा खातीर तोपी वा सत्री वापरात. सुर्याच्या किरणां पसून वाचपा खातीर घरांत पड्डे वापरात. पातळ आनी सुती कपडे वापरात. प्रवासांत पिवपाचें उदक वांगडा दवरचें. वतांत काम केल्यार तोपी, सत्री वा वोल्या कपड्यान तकली, मान, तोंड धांपपाचेञ. शरिरांत उदकाचें प्रमाण उणें जाता जाल्यार ओआरएस, घरा केल्ली लस्सी, तोरांचें पन्नें, लिंबूचें उदक, ताक अश्या गजालींचो वापर नेमान करचो. अशक्तपणा, तकली दुखप, सेगीत येवपी घाम आनी हेर उश्णतायेचो झटको बसल्यार हीं चिन्नां वळखुचीं आनी घुंवत येत जाल्यार रोखडोच दोतोरांचो सल्लो घेवचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
