काळजा सावन परबीं

भांगरभूंय | प्रतिनिधी

भावंडांनो,
तुमचे शिकवणेचे निकाल लागले. तुमी सगळीं बरे गूण मेळोवन पास जाल्यांत. देखून तुमकां म्हजी काळजा सावन परबीं. भावंडांनो, तुमकां आतां माया म्हयन्याची सुटी पडल्या खरी, तरी कांय भावंडां अभ्यासाची जापसालदारकी वाडिल्ल्यान आजूनय शिकवणेंत आसात. ही बरी गजाल. पुणून भावंडांनो, एक सांगतां, तुमच्या जिवाक मात्शी थाकाय मेळचे खातीर, मनाचो शीण घालोवपा खातीर, तुमचे कले वरवीं सांस्कृतीक मळार, तशेंच खेळाच्या कुशळटाये वरवीं खेळां मळार मात्शीं वावरात. तुमचे कलेक आनी खेळाक मात्शी चालना मेळूं दी. सुटयेंत मायेमोगाच्या मामागेर, काकागेर, मावशेगेर दोन दीस रावून येयात. नव्या वाठारांनी जाणट्या वांगडा थोडी भोवंडी करीत. तातुंतल्यान तुमकां आनंद मेळटलो, गिन्यानय मेळटलें. कळ्ळें? याद उरतली न्हय? बरें तर.
तर भावंडांनो, ह्या सप्तकांत आमी याद काडुया रेड क्रॉस संस्थेची.
भावंडांनो, रेड क्रॉस ही समाजाची सेवा करपी अशी संस्था आसा जी झुजांत जखमी जाल्ल्या जवानांचो, सैनिकांचो जी वाटावपा खातीर तळमळीन वावुरता. इतलेंच न्हय तर भुंयकांप, चक्री वादळ वा रानाक उजो लागता तेन्ना अशे तरेच्या सैमीक संकश्टांत मजती खातीर धांवून. येवपी ही संस्था. हेन्री ड्युनांट हो हे संस्थेचो संस्थापक. ही संस्था उबी करपाक कारण कितें घडलें तें तुमी जाणात? सांगतां.
भावंडांनो, 1859 वर्सा सोल्फेटिनाचें झुंज जालें. हें झुंज हेन्री ड्युंनांट हाणे आपल्या दोळ्यांनी पळयलें. ह्या झुंजांत पन्नास हजारां वयर सैनिक मेले. इतलेंच न्हय तर झुंजा मळार खाणा-जेवणा बगर, जखमी जवान उपचारां बगर कशे तळमळटाल, रक्ता-मांसांचो कसो चिखल सो जाल्लो तें ताणे उक्त्या दोळ्यांनी पळयल्लें. तें पळोवनच हेन्रीक तांचे सेवेचें पिशें लागलें. लोक ताका पिशेच म्हण्टोले. हेन्री ड्युनांटान झुंजा मळार जखमी जवानांचे हाल पळयल्ले. ते ताणे सुवेनियर ऑफ सोल्फे रिनो नांवाच्या पुस्तक रुपान जगामुखार हाडले. येरोपांत तें पुस्तक गाजलें. तें पुस्तक वाचून झुंजा मळार राष्ट्रसंपतीचें कशें लुकसाण जाता तें लोकांक कळ्ळें. 1864 वर्सा जेनेवा परिशदेंत हो मुद्दो खूब गाजलो आनी तेच वेळार झुंजांत जखमी जावपी वा दुयेत पडपी जवानांची सेवा करपा खातीर आपवावुरपी दळां उबारचीं अशें सगळ्या राष्ट्रांनी एकमतान थारायलें. ड्युरांटाच्या ह्या वावराक संवसारभर नामना मेळ्ळीं. संवसारीक भावपण, मनीसपणाचो धर्म आनी राष्ट्रनिरपेक्ष सेवा हांचे प्रतीक म्हूण धव्या फांटभुंयेचेर तांबडी फुली हें रेड क्रॉसाचें चिन्न थारलें. जगाच्या फांचीर खंयीय, केन्नाय मजती खातीर धांवून वचपी संघटना जाय म्हणपी हेन्रीचें सपन पुर्णत्वाक आयलें. हे संस्थेचो रूख व्हडव्हड जायत गेलो. तीस वर्सानीं सेवेची दखल घेवन तांकां नेबेल पुरस्कार फावो केलो.
1920 वर्सा रेड क्रॉस ची संस्था स्थापन जाली. आमच्या देशांतलो म्हापूर आनी भारत-पाक मजगतच्या झुंजावेळार रेड क्रॉसान भोव मोलादीक सेवा दिली. संस्थेचे पुराय संवसारांत पावणे दोनशे फांटे आसात जाल्यार तिशेक कोटी वांगडीसेवेंत राबतात. तीन वेळां नोबेल पुरस्कार मेळोवपी रेड क्रॉस ही एकोडी संस्था आसा.
भावंडांनो, हेन्री ड्युरांट हांचो 8मेक वाडदीस. तांचो वाडदीस आंतर राष्ट्रीय रेड क्रॉस दीस म्हूण पुराय संवसारभर पाळटात. ते निमतान 8 मेक तांची याद काडून आमचें मनीसपण जागोवपी कार्य करपाचो संकल्प आमी वाडीक लावया आं. उल्हासभाई