भांगरभूंय | प्रतिनिधी
दिसान दीस तरणाट्यां मदीं काळजाचो आताक येवपाचो प्रमाण चिंतेचो विशय जावपाक लागला. पयलीं जाण्ट्यां लोकां मदीं दिसपी ही समस्या आतां तरणाट्यां मदीं चड प्रमाणांत दिसून येता. जिणेशैली बदलप हें हाचे फाटलें मुखेल कारण आसूं येता. काळजाच्या दुयेंसाच्या सुरवातीच्या काळांत ताण आनी मानसीक भलायकी हेय म्हत्वाचे कारण आशिल्ल्याचें दिसून आयलां. हे संबंदीत समस्या उणी करपा खातीर ल्हान पिराये सावन नेमान भलायकी तपासणी करप गरजेचें आसा. तशेंच निरोगी संवयीं पाळप म्हत्वाचें.
काळजाचो आताक येवपाचीं लक्षणां खंयचीं?
काळजात अस्वस्थताय, स्वास घेवपाक त्रास जावप, चड थकवो येवप हीं लक्षणां दिसूं येतात. जबड्यांत दुखप, फाटीच्या वयल्या भागात दुखप, मळमळप अशीं लक्षणां दिसल्यार काळजाचो आताक येवपाची शक्यताय आसूं येता. ह्या लक्षणां कडेन दुर्लक्ष करचें न्हय आनी ही लक्षणां दिसल्यार रोखडोच दोतोराचो सल्लो घेवचो.
धोको कित्याक वाडलो?
ताण, खावपाची चुकीची संवय, जेवणाच्यो वेळो पाळप ना, सद्दां फास्ट फुडाचे सेवन आनी शारिरीक क्रियाकलाप उणो अशा जिणे पद्दतीच्या घटकांक लागून तरणाट्यां मदीं काळजाच्या दुयेंसांचो धोको वाडलो. नेमान व्यायाम करचो आनी काळजाक निरोगी आहार घेवचो, जाका लागून काळीज निरोगी दवरूं येता. तरणाट्या मदीं काळजाच्या आताकाच्या लक्षणां विशीं जागृताय करप म्हत्वाचें.
धोको उणो कसो करप?
काळजाच्या दुयेंसांचो धोको उणो करपा खातीर नेमान शारिरीक क्रियाकलापांक प्राधान्य दिवप आनी सप्तकांतले उण्यांत उणे पांच दीस व्यायाम करप गरजेचें आसा. चलप, पेंवप वा सायकल चलोवप अशा विंगड विंगड एरोबिक कार्यावळींचो आस्पाव केल्यार काळजाचो स्नायू घटमूट जाताच तशेंच वजन नियंत्रित आनी रगतदाब नियंत्रीत करपाकय मजत जाता.
खंयचो आहार म्हत्वाचो?
निरोगी काळजाक फळां, पांचवो भाजीपालो, पुराय कड्डणां आनी प्रथिनां भरपूर आहाराची गरज आसता. अँटिऑक्सिडंट्स आनी ओमेगा-3 फॅटी अॅसिड भरपूर आशिल्लें अन्न खाल्यार दाह उणो करपाक आनी हृदयविकारापसून राखण करपाक मजत जाता.
व्यायाम, ध्यान वा योग ताण वेवस्थापन करपाक मजत करूंक शकता. ताणाक लागून काळजाचे त्रास जावंक शकतात हें लक्षांत दवरात. देखून ताण वेवस्थापन करप म्हत्वाचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
