काळजाचें दुयेंस टाळूं येता….

भांगरभूंय | प्रतिनिधी

नोकरी करतना भलायकेची जतनाय घेवप सगळ्यांकच जमता अशें ना. कांय जाण जीम आनी योगा सारकिल्ल्यो गजाली नोकरी वांगडाच आपले जिणे पद्दतीचो एक भाग करतात. पूण, कांय जाणांक वेळ नाशिल्ल्यान तांचे ह्या गजालीं कडेन दुर्लक्ष जाता. सध्या ऑफिसांत काम करपी लोकांकय काळजाचो आताक येवपाक लागला.
संवसारभर काळजाचे दुयेंस हें मरण येवपाचें मुखेल कारण. दर वर्सा 18 लाख लोकांक ह्या कारणाक लागून मरण येता. इंडियन कावन्सिल ऑफ मेडिकल रिसर्च हे संस्थेन केल्ल्या अभ्यासा प्रमाण भारतांतल्या सुमार 60 टक्के लोकांक काळजाचे दुयेंस आसात.
तज्ञांच्या मतान, काम करपी लोक कांय उपाय करून काळजाचे दुयेंस टाळूंक शकतात.
ऑफिसांत बसून काम करपी लोक दीसभर उर्जा मेळोवपा खातीर कॉफीचेर आदारून आसतात. कॉफी पियेवप भलायके खातीर बरें आसलें तरी चड पियेल्यार काळजाची गती वाडटा आनी रगतदाब वाडटा. जाका लागून तुमकां भंय दिसूंक शकता आनी अशे स्थितींत काळजाचो आताक येवं येता. हें टाळपा खातीर फकत सकाळीं कॉफी घेवची.
ऑफिसांतल्या वेंडिंग मशिनांतल्यान रोखडेंच कितेंय खावप सोयीचें थारूंक शकता. पूण सदांच पोशक पर्याय निवडप कुडीक आनी काळजाक फायदेशीर आसता. देखून तुमची उर्जेची पातळी सांबाळपाक आनी काळीज निरोगी दवरपाक पुश्टीक आहार घेवचो.
कामाचेर वच्चें पयलीं फावो ती न्हीद जावंक ना जाल्यार थाकाय, चिडचिडेपण येता आनी कामाचेर लक्ष लागना. न्हीद नाशिल्ल्यान मनशाच्या कामाचेर, तशेंच काळजाचे भलायकेचेर परिणाम जाता. एका संशोधनाच्या मतान उण्या प्रमाणांत न्हीद घेवपी लोकांक काळजाचे दुयेंस जावपाचो धोको 29 टक्क्यांनी वाडटा. न्हीद उणी जाल्यार हें धोक्याचे थारूंक शकता. ताका लागून रगतदाब आनी काळजाचो आताक येवपाचोय धोको वाडटा. तेन्ना प्रत्येकान उणीच सात वरां न्हीद घेवची.
सायन्टिफिक रिपोर्ट्स ह्या नेमाळ्यांत उजवाडाक आयिल्ल्या अहवाला प्रमाण ताण, हार्मोन कॉर्टिसोलाची पातळी चड आशिल्ल्या लोकांक काळजाचो आताक येवपाचो चड धोको आसता. ताण पडल्यार रगतदाब वाडटा आनी संभाव्य काळजाच्या दुयेंसांचो धोको वाडटा. ताण उणो करपाक योग आनी ध्यान करचें. आवडीचें संगीत आयकूचें. छंद बाळगुचे.
चड वेळ बसल्यार डीन वेन थ्रोम्बोसिसचो धोको वाडूंक शकता. जी रगत गोठेवपाची स्थिती आसा. दीसभर काम करतना उबें रावप, ताणप वा मदीं मदीं भोंवप अशे तरेन विसव घेवचे.
काम करपी लोक सदांच आपल्या कामांत घुस्पून उरतात आनी भलायकेची योग्य जतनाय घेनात. पूण काळजाक भलायके खातीर बरी जीण केन्ना आपणावंक मेळटा हें समजून घेवप म्हत्वाचें. तुमी जिणे पद्दतींत वयले बदल करुं शकतात.