भांगरभूंय | प्रतिनिधी
केपें : कालें – चानीमळांतल्या बंद आशिल्ल्या चिऱ्याखणींत रसायन आनी वैजकी कोयर उडोवपाच्या प्रकरणांत पुलिसांनी सुदेश नायक (मिराबाग) आनी कंत्राटदार दिनकर पटेली (नावेली) हांकां अटक केल्या.
ह्या बंद आशिल्ल्या चिऱ्याखणीक 3 दिसां पयलीं उजो लागिल्लो. तेन्ना सावन कुडचडेंचे उजो पालोवपी दळ दीस-रात उजो पालोवपाचें काम करताले. त्या कोयरांतल्यान विखारी धुंवर भायर सरतालो, देखून लागसारच्या घरांतल्या लोकांक स्थलांतरीत केल्लें.
3 दिसां उपरांत उज्याचेर नियंत्रण मेळोवंक उजो पालोवपी दळाक येस आयलां. उजो आटापा हाडून ताचेर माती घाल्या. चिऱ्याखणींतलो कोयर काडून कोयर वेवस्थापन म्हामंडळान व्हरचो म्हूण थळावे मागतात.
सांगें उपजिल्होधिकाऱ्यांच्या मार्गदर्शना खाला दळान उजो आटापा हाडलो तरी मातये पोंदां आशिल्ल्या कोयरांत उज्याचें अस्तित्व जाणवता. थळावे सर्वेश पागी हांणी हो प्रकार वयले वयर घेवं नाकात. पुराय उपाय काडात अशें म्हणलां. तशेंच पावस लागीं आयला. पावसाच्या उदका वांगडा चिऱ्याखणींतल्या रसायन आनी कोयराचे उदक थळाव्या बांयांनी, न्हंयेंत वचपाक शकता, अशी शिटकावणीय थळाव्यांनी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
