भांगरभूंय | प्रतिनिधी
मोदी सरकार इतिहासीक निर्णयाचे तयारेंत
नवी दिल्ली, खबरां संस्था: गाडी, मोटार सायकल, मोबायल, कॉम्प्युटर सगळें जातलें सवाय. मोदी सरकार इतिहासीक निर्णयाचे तयारेंत. केंद्र सरकारान जीएसटी प्रणालीत व्हड बदल प्रस्तावीत केला. सरकारी सुत्रां प्रमाण, नवे रचणुकेंत ५ टक्के आनी १८ टक्के अशे जीएसटीचे दोन मुखेल दर आसतले, तशेंच लक्झरी आनी माल पडपी वस्तूंचेर (जशें सोरो, तंबाखू आनी हेर) हाचेर ४० टक्के विशेश कर लायतले. सुत्रांचे म्हायती प्रमाण सध्याच्या १२ टक्के जीएसटी स्लॅबांत येवपी सुमार ९९ टक्के वस्तू आतां पांच टक्के स्लॅबांत वतली. तशेंच २८ टक्के स्लॅबांत येवपी सुमार ९० टक्के वस्तू आतां १८ टक्के स्लॅबांत येतल्यो. ह्या बदलाक लागून कर रचणूक सोपी जातली आनी गिरायकांक सुशेग मेळटलो असो विस्वास सरकार उक्तायता.
सरकारान म्हणलें, पांच टक्क्यांचे चोवकटेंत सदां वापरपी वस्तूंचो आसपाव आसतलो. तशेंच, तंबाखू उत्पादनां सयत कांय वस्तूंचेर ४० टक्के विशेश ‘सीन टॅक्स’ लायतले. हे वळेरेंत फकत पांच ते सात वस्तू आसतल्यो, अशी म्हायती सुत्रांनी दिली.
ह्या वस्तूंचेर पयलींच चड कर लायतात. तंबाखू खावपाचेर १६० टक्के कर लायतात आनी सिगारेटीचेरर जीएसटी, उपकर आनी राष्ट्रीय आपत्ती आकस्मीक शुल्काच्या मिश्रणा वरवीं कर लायतातौ
तशेंच कामगार-केंद्रीत आनी निर्यात-केंद्रीत उद्देगां वरवीं उत्पादन केल्ले हिरे आनी मोलादीक फातरां सारक्या कांय हेर वस्तूंचेर सध्याच्या दरां प्रमाण कर लायतले. निमाणें पेट्रोलियम उत्पादनां जीएसटी चौकटा भायर चालूच उरतलें.
सप्टेंबरांत जावपी जीएसटी परिशदेचे बसकेंत ह्या प्रस्तावाचेर चर्चा जातली. निर्णय जाल्यार वापरांतले अपेक्षीत वाडीचेर सुमार ५० हजार कोटी रुपयांचें महसूल लुकसाण भरतलें अशी अपेक्षा आसा.
सदचे जिणेंत वापरपी वस्तू सवाय जातल्यो. मात त्यो नेमक्यो खंयच्यो हें स्पश्ट जावंक ना. सुत्रांचे म्हायती प्रमाण हातूंत टूथपेस्ट पसून सत्री आनी ल्हान घरगुती उपकरणां, जशें शिवण करपी मशीन, प्रेशर कुकर आनी ल्हान वॉशींग मशीन हांचो आसपाव आसपाक शकता.
ज्येश्ठ नागरिकां खातीर डेंटल इम्प्लांटची किंमत तुमकां अजापीत करपाक शकता. सायकल, तयार कपडे (१००० रुपया परस उणे किंमतीचे) आनी शूज-चप्पल (५०० ते १००० रुपयां मजगतीं) हांचोय आसपाव आसपाक शकता. तशेंच लस, सिरेमीक टायल्स आनी शेताचीं साधनां हांचोय आसपाव आसपाक शकता.
तशेंच मोबायल फोन आनी कॉम्प्यूटर (आयच्या डिजिटल संवसारांत गरजेच्यो वस्तू), केंसांचें तेल, प्रक्रिया केल्लें जेवण आनी शाळेंतल्या भुरग्यां खातीर स्टेशनरी वस्तू जश्यो भुमिती बॉक्स आनी नोटबूक हांचोय आसपाव आसतलो.
टेलिव्हिजन, एअर कंडिशनर, रेफ्रिजरेटर, वॉशिंग मशीन आनी एरेटेड वॉटर, तशेंच बांदकाम उद्देगांत वापरपी कांय वस्तू, जश्यो रेडी-मिक्स कॉंक्रीट आनी सिमेंट, नवें १८ टक्के जीएसटी वळेरेंत आसपाची शक्यताय आसा.
सध्या प्रवासी वाहनांचेर २८ टक्के जीएसटी आनी इंजिन तांक, लांबाय आनी बॉडी टायप प्रमाण २२ टक्के भरपाय उपकर आकारतात. इलेक्ट्रीक गाडयांचेर पांच टक्के कर लायता आनी कसलेच तरेचो भरपाय उपकर आकारनात.
दुचाकी वाहनां खातीर हें दर २८ टक्के आसा. ३५० सीसी मेरेन इंजिन तांक आशिल्ल्या मॉडेल्स खातीर कसलेच तरेचो भरपाय उपकर ना, तर ते मर्यादे परस चड आशिल्ल्या मॉडेल्सांचेर तीन टक्के उपकर भरचो पडटा.
सुदारीत जीएसटी रचनेक लागून २८ टक्के श्रेणी रद्द केल्या, म्हणजेच कार आनी बायक नवे १८ टक्के श्रेणीत येतलें, जाका लागून त्यो उण्यात उणें १० टक्के सवाय जातले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
