भांगरभूंय | प्रतिनिधी
स्पेनाच्या कार्लोस अल्काराजान पांच सेटां मेरेन चलिल्ले मॅचींत अमेरिकेच्या फ्रान्सीस टियाफोक हारोवन अमेरिकन ओपनाच्या दादल्यांच्या एकोड्या गटांतले फायनलींत सुवात मेळयली. फायनलींत तो नॉर्वेच्या कॅस्पर रुडा आड खेळटलो.
दोनूय पयले खेपे अमेरिकन ओपनाचे फायनलींत पाविल्ल्यान हे खेपे नवो चॅम्पियन पळोवपाक मेळटलो.
टियाफोन साबार साद्यो चुकी केल्यो. ताचो कार्लोसान बरे तरेन फायदो घेत 6-7 (6), 6-3, 6-1, 6-7 (5) आनी 6-3 अशा सेटांनी जैत जोडून पयले खेपे खंयचे ग्रॅण्ड स्लॅम सर्तीचे फायनलींत सुवात मेळयली.
ह्या जैता सयत कार्लोस 19 वर्सां पिरायेचेर संवसारांतलो पयल्या क्रमांकाचो टॅनीस खेळगडो जावपाचे वांटेर आसा. पूण, ते खातीर ताका रुडाच्या आव्हानाक तोंड दिवचें पडटलें. रुड वस्तादपण जोडटा जाल्यार तो संवसारांतलो पयल्या क्रमांकाचो खेळगडो जातलो.
सध्या संवसारीक क्रमवारींत सातवे सुवातेर आशिल्ल्या रुडान पयले सेटांत 55 शॉटा मेरेन चलिल्लो पॉयण्ट जिखून आपली लय कायम राखली आनी रशियेच्या करेन खाचानोवाक 7-6 (5), 6-2, 5-7, 6-2 अशा सेटांनी हारोवन फायनलींत सुवात मेळयली.
नॉर्वेचो 23 वर्सां पिरायेचो रुड अंदूंच्या वर्सांत दुसरे खेपे ग्रॅण्ड स्लॅम सर्तीचे फायनलींत पावलो. जूनांत जाल्ले फ्रॅंच ओपनाचे फायनलींत लेगीत तो पाविल्लो. पूण, त्या वेळार ताका क्ले कोर्टाचो बादशा राफायल नादाला कडल्यान हार घेवची पडिल्ली.
मजगतीं, कार्लोसाक क्वॉर्टरफायनलींत लेगीत पांच सेटां मेरेन मॅच खेळची पडिल्ली. पूण, सेमीफायनलींत खेळटना थकिल्ल्याचें कसलेंच लक्षण ताचे मदीं दिसूंक ना.
सेमीफायनलींत खेळिल्ले चारूय खेळगडे पयले खेपे अमेरिकन ओपनाच्या निमाण्या चारां मेरेन पाविल्ले. ताका लागून त्याच वेळार हे खेपे अमेरिकन ओपनाक नवो चॅम्पियन मेळटलो हें निश्चीत जाल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
