भांगरभूंय | प्रतिनिधी
स्पेनाच्या 19 वर्सां पिरायेच्या कार्लोस अल्कारेझान अंदूंची अमेरिकन ओपन जिखली. फायनलींत ताणें नॉर्वेच्या कॅस्पर रुडाक 6-4, 2-6, 7-6 (1) आनी 6-3 अशा चार सेटांनी हारयलो. मॅच तीन वरां आनी 20 मिनटां मेरेन चल्ली. ह्या जैता सयत अल्कारेझ दादल्यांच्या एकोड्या गटांतलो पयल्या क्रमांकाचो खेळगडो थारलो. ताणें कारकिर्दींत पयलेच खेपे ग्रॅण्ड स्लॅम सर्त जिखली.
32 वर्सांनी अमेरिकन ओपन जिखपी तो सगल्यांत युवा खेळगडो थारलो. ताचे पयलीं म्हणल्यार 1990त अमेरिकेच्या पीट साम्रासान 19 वर्सां पिरायेचेर अमेरिकन ओपनाचो किताब जिखिल्लो. 2005त स्पेनाच्या राफायल नादालान 19 वर्सां पिरायेचेर फ्रॅंच ओपन जिखिल्ली.
अल्कारेझ संवसारीक क्रमवारींत पयले सुवातेर पावपी सगल्यांत युवा खेळगडो थारलो. खेळगड्यांक रॅंकींग दिवपाची सुरवात 1973 पसून जाल्या. ताणें ऑस्ट्रेलियेच्या ल्युटन हेविटाचो विक्रम मोडलो. हेविट 2001त 20 वर्सां, 8 म्हयने आनी 23 दिसाचो आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
