भांगरभूंय | प्रतिनिधी
समाजाच्या प्रत्येक घटकाक स्वताची जमीन, हक्क, घर मेळप होच म्हजे मतीन समाजीक न्याय. सरांच्या कल्पक विचारांतल्यान श्रमधाम हो विचार आयलो.
बिरसा मुंडा हो एक जननायक. जल, जंगल, जमीन ह्या मुळसिद्धांत घेवन आपलें कार्य भारत मातेचे सेवे खातीर केलें. समाजांत एक क्रांती ज्योत पेटयली. समाजिक न्यायाची बुन्याद ह्या वीरपुरसान त्यावेळार घाली. मुंडा हांची विचारधारा आयज लेगीत जिवी आसा, हे तांची जयंती पुराय देशांत मनयतात हाचे वयल्यान कळटा. दरवर्सा 15 नोव्हेंबराक ती मनोवपाचें केंद्र सरकारान थारायलां.
कांय दिसां पयलीं काणकोणां पावलां. तेन्ना अशीच एक अनुभूती आयली, ती म्हणल्यार आमचे भोवमानादीक कला संस्कृतीमंत्री रमेशसर तवडकार हांचें कार्य. आपलो गांव, आपली माती आनी आपल्या लोकां वांगडा भावनात्मक संबंद ते सोडून आसात. मंत्री, आमदार जावन गोंयभर भ्रमण करतना कितलोय वेळ वचूं, ते आपल्या आमोणें गांवांत आयज मेरेन वास्तव्य करून आसात. हेर कोणूय पणजे रावपाक वचपाचो, पूण सरांक आपले मातये पसून पयस रावपाचें ना. तांची नाळ मातये कडेन घट जुळिल्ली आसा. गांवांत रावन फक्त आनी फक्त जनसेवाच करप अशें तांणी थारायलां.
काणकोण सारक्या वाठारांत आयज बलराम शिक्षणीक संस्था समाजाचे नवे पिळगेक बरें शिक्षण मेळचें, समाजीक नदरेन दुबळी आशिल्ले पिळगेक योग्य दिशा मेळची, मार्गदर्शन मेळचें म्हूण वावुरता. योग्य संस्कार आनी देशप्रमी नागरिकांची पायाभरणी हे संस्थेंत जाता. दूरदिश्टी दवरून समाजकारण कशें करचें हाचें हें बरें उदाहरण. तांचो शांत, संयमी, शिस्तबद्द सभाव. प्रत्येक कृतींत एक समाजीक चेतना कशी जागोवपाची ताचो हो प्रामाणीक यत्न. समाजाच्या प्रत्येक घटकाक स्वताची जमीन, हक्क, घर मेळप होच म्हजे मतीन समाजीक न्याय. सरांच्या कल्पक विचारांतल्यान श्रमधाम हो विचार आयलो.
श्रमधामाचो संकल्प म्हणल्यार दरेकल्या शोशीत, पिडेस्त, गरीब, मागास, अर्थिक नदरेन दुबळो, कश्टकरी समाजांतल्या मनशाक सशक्त करप. हें पवित्र काम आमच्या सरान हातांत घेतलें. समाजांतल्या निमणे व्यक्ती सर्वांगी विकास जावचो हे खातीर ते वावुरतात. श्रमधामाक लागून हजारांनी तरणाटे स्वता जावन आकर्शित जाल्यात आनी तांच्या मनांत समाजचेतनेचो दिवो पेटला. अडिल्ल्या, असहाय्य व्यक्तीक वैयक्तीक मजत करप हाचे सारकें पुण्याचें काम दुसरें ना. हे येवजणेक लागून शेंकड्यांनी लोकांची घरां उबीं जाल्यांत. आपलें घर आसतलें असो सपनांत पसून विचार करूंक नाशिल्ल्या लोकांक आयज घर मेळ्ळां. तांचें आशिर्वाद सरांक मेळटले.
आमच्या सारक्या तरणाट्यांक समाजीक मळाचेर काम करपाक सरां पसून सातत्यान प्रेरणां मेळटा. आमी ज्या समाजीक चेतना आनी कामा खातीर वळखतात, ताचें बीं आमच्या मनांत रमेश तवडकार सरांनूच रोंयलें, हें आयज अभिमानान सांगतां. अशें फुडारपण मेळप हें काणकोणकारांचेंच न्हय, तर राज्याचें भाग्य. पुराय देशांत तवडकार सरांच्या कार्याची चर्चा जाता. व्यक्ती पदाचेर विराजमान जालो, सत्ता उपभोगली म्हूण जायना, ताणें आपले सत्तेचो वापर सामान्यां खातीर, खास करून गरीब लोकां खातीर करपाक जाय. तांचे खातीर रातदीस कार्य करपाक जाय.
समाजीक कल्याण आनी गरिबांची सर्वांगी उदरगत हो मुळमंत्र घेवन सर काम करतात. तांचे हे वाटचालींत आमी सरांचे वावुरपी तांच्या प्रत्येक कार्याक साथ दिवपांत तत्पर आसात.
शुभम गांवकार
उसगांव
72640 15488
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
