भांगरभूंय | प्रतिनिधी
पणजीः नुवेंच्या कार्मेल उच्च माध्यमीक विद्यालयांत 21 फेब्रुवारीक संवसारीक मायभास दीस उमेदीन मनयलो. हो सुवाळो विद्यालयाच्या कोंकणी विभागान गोवा कोंकणी अकादेमीच्या जोडपालवान आयोजीत केल्लो.
कोंकणी अकादेमीचे ‘लेखक विद्यार्थ्यांचे भेटेक’ येवजणे खाला गोंयांतली नामनेची साहित्यीक नयना आडारकार मुखेल सोयरी हाजीर आशिल्ली. उपचारीक कार्यावळी आदीं कोंकणी भास घेतिल्ल्या विद्यार्थ्यांनी संवसारीक भाशेचें म्हत्व सागपी तयार केल्ल्या वण्टीपत्रकाचें तशेंच तकट्यांचें आडारकार हांचे हस्तुकीं उक्तावण जालें. उपचारीक कार्यावळीचें उक्तावण यत्ता 11वीच्या विज्ञान फांट्यांत शिकपी विद्यार्थ्यांनी येवकार गीत सादर केलें. मुखेल सोयरी आडारकार, कोंकणी शिक्षिका क्लियोपात्रा, योगिता वेर्णेकार आनी विद्यार्थी प्रतिनिधी स्मृती नागवेंकार हांचे हस्तुकीं दिवली पेटोवन कार्यावळीचें उक्तावण जालें.
विद्यार्थीनी शलोम गामा हिणे मायभाशेचेर विचार मांडले. उपरांत नामनेच्या कोंकणी कवींच्यो कांय वेंचीक कविता यत्ता 11वेच्या विज्ञान आनी वाणिज्य फांट्यांत शिकपी विद्यार्थ्यांनी सादर केल्यो. तातूंत सिमरन नायक, स्टेसी नोरोन्हा, वेनेझा फर्नांडीस, निफा अँब्रेंचीस, पर्ल कार्व्हालो, सिया नायक, वेनेझा फर्नांडीस, वेदिका बलनायक, सिया कुंकळ्येकार, सुहानी बोली, रिया गोम्स आनी तानिया शिंदे हांणी वांटो घेतलो.
मायभास आमची खरी वळख ह्या विशयाचेर यत्ता 11 कला फांट्यांत शिकपी विद्यार्थ्यांची गटचर्चा जाली. तातूंत स्विन्सी फर्नांडीस, रेचल डिमेलो, उन्नती चोडणकार, एलिसिया वाझ, वेलंकिनी परेरा आनी एसनिता फर्नांडीस हांणी वांटो घेतलो.
लेखक विद्यार्थ्यांचे भेटेक कार्यावळींत मेलिसिया वाझ हिणें नयना आडारकार हांची वळख करून दिली. मनस्वी बांदोडकार हांणी आडारकार हांची मुलाखत घेतली. मुलाखती वेळार आडारकार हांणी आपले अणभव सांगले. तशेंच तिणें रचिल्ली यत्ता बारावेच्या अभ्यासक्रमांत आशिल्ली ‘सगळें आतां इतिहासजमा’ ही कविता गावन दाखयली. ते कवितेचो अर्थ ना रचने फाटली फाटभूंय सांगली. अखंड वाचन करात आनी मायभाशेक विसरूं नाकात, असो सल्लो तांणी विद्यार्थ्यांक दिलो.
11 वी कला फांट्याक शिकपी विद्यार्थ्यांनी गोंयचे राजभाशेचेर आदारीत गिताचेर नाच सादर केलो आनी कार्यावळीची सांगता जाली. जोलिंडा नोरोन्हा हांणी सुत्रसंचालन केलें जाल्यार अन्विष्का फर्नांडीस हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
