भांगरभूंय | प्रतिनिधी
-विरोधाविणें वेंचणूक; आयज जातली घोशणापणजीः भाजपाचे उत्तर गोंयचे अध्यक्ष म्हणून दयानंद कार्बोटकार विरोधाविणें, जाल्यार प्रभाकर गांवकार भाजपाचे दक्षीण गोंयचे अध्यक्ष म्हणून विरोधाविणें वेंचून आयल्यात. दोगांयनी शुक्रारा उमेदवारीपत्र सादर केलां. आयज तांचीं नांवां जाहीर जातली.
36 मतदारसंघांनी मंडळ अध्यक्षांची नेमणूक जाले उपरांत भाजपान दोनूय जिल्हो अध्यक्ष वेंचपाची प्रक्रिया सुरू केल्ली. भाजपांतली संघटनात्मक वेंचणूक सदांच विरोधाविणें जाता. तशेंच 36 मंडळ अध्यक्षांची नेमणूक लेगीत विरोधाविणें केल्ली. तेच प्रमाण दोनूय जिल्हो अध्यक्षांचीय वेंचणूक विरोधाविणें जाली.
मजगतीं, दयानंद कार्बोटकार आनी प्रभाकर गांवकार हे दोगूय भाजपाचे पोरणें आनी निश्ठावान कार्यकर्ते. देखून पक्षान हे खेपे दोगांकय जिल्हो अध्यक्ष जावपाची संद दिल्या. आमच्या प्रतिनिधी कडेन उलयतना भाजपाच्या एका वरिश्ठ फुडाऱ्यांक तांच्या निवडीक सगळ्यांनी तेंको दिल्ल्याची म्हायती दिली.
……………………………….
बॉक्स
आतां नव्या अध्यक्षाची वाट
– जिल्लो अध्यक्षाची नेमणूक जाले उपरांत आतां भाजपाच्या नव्या प्रदेशाध्यक्षाचें नांव जाहीर जातलें. फुडल्या आठ दिसांत ही प्रक्रिया पुराय जातली अशी म्हायती भाजपा सूत्रांनी दिल्या.
– सध्या आदले खासदार नरेंद्र सावयकार, आदले मंत्री दयानंद मांद्रेकार, दिलीप परूळेकार, आदले उपमुख्यमंत्री बाबू कवळेंकार, आदले आमदार दयानंद सोपटे, दामू नायक आनी वरिश्ठ फुडारी गोविंद पर्वतकार ह्या सात जाणां मदीं प्रदेशाध्यक्ष पदाची सर्त आसा.
– प्रदेशाध्यक्ष पदाचे सर्तींत सात फुडारी आसले तरी येवपी जिल्लो पंचायत, नगरपालिका आनी विधानसभा वेंचणुको मतींत दवरून सध्याचे प्रदेशाध्यक्ष सदानंद शेट तानावडे ह्या पदाचेर कायम उरपाची शक्यताय आसा. चडशे आमदार आनी फुडारी तानावडे हांकां कायम दवरपाची मागणी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
